Deputetja e Partisë Socialiste, Zegjine Caushi, publikoi një deklaratë lidhur me përfshirjen e dajës së saj në rastin e dhunës dhe përdhunimit të pretenduar nga 34-vjeçarja M. G., si dhe plagosjen e babait të kësaj të fundit. Ajo postoi edhe një foto të dajës me 34-vjeçaren, ku shfaqen të dy, dhe gruaja mban një tufë me lule në dorë.
Caushi shpjegon se njeh shtetasen në fjalë dhe se kjo e fundit së bashku me dajën e saj i kanë thënë se kishin vendosur të martoheshin, pavarësisht kundërshtimit të babait të 34-vjeçares. Duke iu referuar ngjarjes së ndodhur në fshatin Suk 2 dhe të publikuar nga mediat më 14 dhe 15 shtator 2026, deputetja sqaron informacionet që ka dhënë deri tani. Ajo thekson se familja e nënës së saj përbëhet nga 11 fëmijë (9 motra e 2 vëllezër) dhe se nuk kanë kontakte të vazhdueshme me njëri-tjetrin.
Sipas deklaratës, Caushi takoi rastësisht vëllain e nënës, Bledar Bakaj, së bashku me znj. M. G., pas një takimi që kishte në atë zonë, në fillim të qershorit. Ajo thotë se kaloi pranë banesës dhe pa rreth 10–15 të afërm dhe fqinj në oborr, ku edhe u prezantua M. G. si bashkëjetuesja e Bledarit. Deputetja tregon se iu drejtua atyre me urime dhe se të pranishmit i pyetën “E keni ndarë mendjen? Do martoheni?” M. G. i përgjigjej se po dhe se kishte marrë parasysh kushtet e jetesës edhe pse babai nuk e priste me qejf. Caushi thotë se iu drejtua me fjalën “Se mos na hapni probleme”, dhe situata vijoi me të qeshura dhe urime. Ajo qëndroi rreth 10 minuta dhe pastaj u largua për angazhimet e saj, ndërsa më vonë pa në rrjetet sociale fotografi të tyre së bashku, të qeshur dhe me lule.
Deputetja deklaron se ky është gjithë informacioni që zotëron dhe se për ngjarjen u informua përmes mediave, njësoj si opinioni publik. Ajo dënon me forcë çdo formë dhune, kërkon trajtim serioz dhe me kujdes psikologjik për të dy personat për të gjetur zgjidhjen e duhur dhe për të parandaluar përshkallëzime të mëtejshme, dhe shton se organet e rendit duhet të bëjnë punën e tyre.
