Një nga momentet kryesore të ceremonisë së 78-të të çmimeve Emmy ishte paraqitja e aktorit Michael J. Fox, i cili mori duartrokitje në këmbë nga publiku kur u ngjit në skenë për të pranuar Çmimin Humanitar Bob Hope. Aktori 65-vjeçar, fitues i pesë Emmy, u nderua për kontributin e tij në kërkimin shkencor dhe ndërgjegjësimin për sëmundjen e Parkinsonit. Ai u prezantua nga bashkë-ylli i tij në serialin “The Good Wife”, Julianna Margulies, dhe falenderoi Akademinë për “një nder të jashtëzakonshëm”.
Gjatë fjalimit, Fox kujtoi shembullin e Bob Hope dhe ndikimin që pati në jetën e tij: “E mësova nga shembulli i tij.” Ai rikujtoi se u diagnostikua me Parkinson në vitin 1991 kur ishte 29 vjeç dhe bëri publike diagnozën në 1998. Në fillim, Fox tha se mbajti sëmundjen të fshehtë nga frika se do të ndikonte në karrierë dhe marrëdhëniet me publikun, por pasi e bëri publike u befasua nga mbështetja që mori: u ndje i fortë dhe kuptoi se nuk kishte humbur atë që po bënte.
Fox theksoi se pranimi i sëmundjes nuk nënkupton dorëzim: “E kuptova se pranimi i sëmundjes së Parkinsonit nuk do të thoshte se duhej t’i dorëzohesha asaj. Do të thoshte se duhej të bëja atë që mundesha për të gjithë ata që jetojnë me këtë sëmundje.” Pas diagnozës, ai nisi një përpjekje të gjerë për të mbështetur kërkimin shkencor dhe për të mbledhur fonde për trajtime, duke formuar dhe financuar iniciativa kërkimore me qëllim të avancimit të shkencës në këtë fushë.
Aktori shprehu krenari për progresin e arritur në dobi të pacientëve dhe familjeve të tyre, duke vlerësuar stafit, donatorët, studiuesit dhe komunitetin e pacientëve për rolin e tyre në punën e fondacionit të tij. Në fund të fjalimit falenderoi familjen dhe Bob Hope, të cilët sipas tij “i treguan rrugën”.
Përveç çmimit humanitar, Fox ishte i nominuar në kategorinë e aktorit më të mirë të ftuar në një serial komedi për “Shrinking”; çmimin në atë kategori e mori Rob Reiner, disa muaj pas vdekjes së tij.
