Anëtari socialist i Këshillit Bashkiak të Tiranës, Halit Valteri, kërkoi lirimin nga paraburgimi të kryebashkiakut Erion Veliaj, duke argumentuar se hetimet ndaj tij janë mbyllur prej rreth një viti dhe nuk ekziston rreziku i ndikimit mbi provat. Në emisionin “Shqipëria Live” Valteri pyeti pse vazhdon masa e arrestit me burg, duke thënë: “Ka një vit që është mbyllur hetimi. Çfarë provash do të prishte këtë vit që është mbyllur hetimi? Çfarë e bën një prokuror ta persekutojë tjetrin?” Ai pretendoi se ndaj Veliajt është vepruar me standard tjetër, duke bërë krahasim me raste të krimeve të rënda: “Krimineli që akuzohet për 4-5 vrasje iku me vrap, ndërsa Veliajt i futen 30 policë në sallën e operacionit. Pra, ka persona që janë të investuar që Veliaj të rrijë në burg.”
Valteri iu referua edhe vendimit të Gjykatës Kushtetuese, dhe paralajmëroi se moszbatimi i rekomandimit të saj do të ishte një goditje për drejtësinë: “Fundi i drejtësisë do të ishte nëse nesër nuk do të zbatohej rekomandimi i Kushtetueses që thotë se Tiranës i duhet kryebashkiaku.” Ai lidh argumentin për lirimin e Veliajt me ndikimin e mungesës së tij në funksionimin e administratës së kryeqytetit, duke përmendur pastrimin, mirëmbajtjen e rrugëve dhe vendimmarrjen për investimet.
Sipas Valterit, mungesa e Veliajt ka reflektuar në degradimin e shërbimeve: “Sot Tirana është më e pisët, pa rrugë, Drejtoria e rrugëve fle gjumë. Drejtoria e pastrimit të Tiranës është më e dështuara.” Ai akuzoi largimin e stafit që, sipas tij, punonin për interesa personale dhe përmendi drejtorë pa kontribut në komunitet që miratonin buxhetin. Si shembull konkret solli zonën e Kasharit, ku sipas tij ka vetëm 30 minuta ujë dhe vendime për investime nuk merren pa autoritetin e kryebashkiakut: “Drejtori i ujësjellësit, me gjithë respektin që kam për të, nuk mund ta marrë i vetëm këtë vendim.” Përfundoi duke kritikuar korrupsionin dhe paaftësinë në bashki dhe duke thënë se duhet “dorë e fortë” për t’i larguar ata. Teksti buron nga Top Channel.
