Mazhoranca mbështet propozimin për rritjen e pagës referuese të magjistratëve nga 36% në 38% të pagës së Presidentit të Republikës. Projektligji u shqyrtua në Komisionin e Ekonomisë dhe Financave, ku socialistët argumentuan se formula respekton vendimin e Gjykatës Kushtetuese dhe mundësitë financiare të shtetit. Sipas draftit, rritja do të jetë rreth 8,500 lekë për pagën referuese të magjistratëve, shumë më e ulët se kërkesa e KLGJ dhe KLP, që kishin kërkuar rreth 80,000 lekë.
Propozuesja e draftit, Aulona Bylykbashi, tha se Gjykata Kushtetuese nuk ka përcaktuar një formulë konkrete, por ia ka lënë Kuvendit zgjedhjen e mënyrës së llogaritjes. “Me këtë nismë synojmë të zbatojmë vendimin e Gjykatës Kushtetuese. Synojmë përcaktimin e pagave, por edhe pabarazinë në hierarkinë brenda sistemit. Neni 138 garanton se pagat e përfitimeve dhe gjyqtarëve nuk mund të ulen. Kushtetuesja nuk na ka referuar një formulë të detyrueshme, zgjedhja është te ligjvënësi me kushtin që të mos ketë ulje. Koeficienti 0.38 është zgjedhur për garancitë kushtetuese për magjistratë, por edhe nga ana tjetër ta themi hapur, ka marrë në konsideratë mundësitë e buxhetit të shtetit”, tha propozuesja.
Projektligji ka marrë edhe mbështetjen e qeverisë. Përfaqësuesi i Ministrisë së Drejtësisë vlerësoi se koeficienti i propozuar përmbush kushtet e vendosura nga Gjykata Kushtetuese: “Falënderojmë propozuesit. Mendojmë se plotëson kushtet e vendosura nga Gjykata Kushtetuese”. Nga Ministria e Financave u tha: “Kostoja është e pranueshme, jemi dakord”.
Qeveria ka llogaritur rreth 1.5 miliardë lekë detyrime të prapambetura, që lidhen me periudhën nga prilli 2023, kur Kushtetuesja kërkon që të zbatohen efektet financiare. Për shkak të kostos, qeveria propozon që pagesa të bëhet me këste përgjatë dy viteve. Projektligji pritet të kalojë për miratim në seancën e 17 shtatorit.
Partia Demokratike njoftoi se do të votojë kundër. Deputeti Enno Bozdo e cilësoi situatën si pasojë të moszbatimit në kohë të vendimit të Gjykatës Kushtetuese: “Kjo situatë është pasojë e drejtpërdrejtë e mosrespektimit të vendimeve të Gjykatës Kushtetuese… Ne nuk na intereson fare, vendimi i Gjykatës Kushtetuese është ligj për ne. Në emër të grupit njoftoj se ne do të votojmë kundër këtij projektligji”, tha Bozdo.
Debati u përshkallëzua pasi Kuvendi nuk miratoi deri më 31 korrik formulën e re sipas afatit të Kushtetueses. Pas skadimit të afatit, KLGJ dhe KLP vendosën që nga 1 gushti paga referuese të llogaritej mbi 222,425 lekë, plus 14,000 lekë shtesë për kualifikimin, por Ministria e Financave nuk ekzekutoi listëpagesat duke argumentuar se përcaktimi i pagave është kompetencë e Kuvendit.
