Kryeministri grek Kyriakos Mitsotakis përfundoi një vizitë simbolike treditore në Kastelorizo, një prej pikave më të ndjeshme të marrëdhënieve greko-turke, dhe i dërgoi një mesazh të qartë Ankarasë: Greqia kërkon dialog dhe marrëdhënie pa tensione, por nuk do të pranojë kërcënime apo vënie në diskutim të të drejtave të saj sovrane. Siç raporton korrespondenti Aleksandër Marku, vizita në ishull, shumë pranë brigjeve turke, vjen pas një muaji të rritjes së tensioneve mes Athinës dhe Ankarasë.
Tonet mes dy fqinjëve u përshkallëzuan në mes të gushtit kur Turqia shpalli dy “parqe kombëtare detare”, një në Egjeun verilindor dhe një në Mesdheun Lindor pranë Kastelorizos. Athina i cilësoi këto vendime të paligjshme aty ku, sipas saj, shtrihen jashtë juridiksionit turk dhe brenda shelfit kontinental grek. Më pas, Ankaraja reagoi edhe ndaj planeve greke për energjinë e rinovueshme në Egje, duke rikthyer në diskutim çështjen e të ashtuquajturave “zona gri”, ndërsa të dyja palët shkëmbyen nota diplomatike.
Presidenti turk Rexhep Tayyip Erdogan i bëri thirrje Greqisë të ndalojë militarizimin e disa ishujve të Egjeut dhe i kërkoi Athinës “të mësojë nga historia”, deklaratë që në Greqi u interpretua si rikthim i retorikës së fortë të viteve të mëparshme. Në të njëjtën periudhë, autoritetet greke kanë regjistruar fluturime pothuajse të përditshme të dronëve turq Bayraktar në Egjeun verilindor. Athina ka rikujtuar zyrtarisht të drejtën e saj sipas së Drejtës së Detit për të zgjeruar ujërat territoriale deri në 12 milje.
Megjithatë, kanalet e komunikimit mbeten të hapura dhe qeveria greke vazhdon të deklarojë se synon dialogun dhe shmangien e një krize të re me Turqinë. Nga Kastelorizo, Mitsotakis njoftoi masa ekonomike për mbajtjen dhe tërheqjen e banorëve: 5.000 euro në vit për çdo familje dhe 1.000 euro për çdo fëmijë të mitur, si dhe stimuj të veçantë për nëpunësit publikë, ushtarakët dhe forcat e sigurisë që shërbejnë në ishull.
