Drejtori i agjencisë imobiliare “Condor Estates” në Britaninë e Madhe është dënuar me 8 vite e 4 muaj burg, pasi përdori biznesin për të lehtësuar funksionimin e një rrjeti që ngriti 19 ambiente për kultivimin e kanabisit. Pesë persona u dënuan me më shumë se 14 vite burg nga Gjykata e Luton Crown më 10 shtator, pas hetimit të zhvilluar nga ekipi Operation Costello i policisë.
Sipas policisë së Beds dhe burimeve të Top Channel, hetimi zbuloi një rrjet të sofistikuar kriminal që përfshinte kultivimin e kanabisit, kontrata të falsifikuara qiraje, blerjen e pajisjeve hidroponike dhe pastrimin e parave. Në vitin 2024 autoritetet kontrolluan 20 prona — 19 në Luton dhe një në Milton Keynes. Në 19 prona u zbuluan ambiente për kultivim, ndërsa në pronën tjetër u gjetën pajisje për kultivim.
Policia sekuestroi rreth 2,000 bimë kanabisi, me vlerë të përllogaritur deri në 800,000 paund; autoritetet thanë se prodhimi mund të kishte gjeneruar kanabis me vlerë mbi 2 milion paund në 12 muaj, po të mos zbulohej aktiviteti. Në qendër të rrjetit ishte Sarfraz Farooq, 46 vjeç, i akuzuar për falsifikim masiv të dokumenteve dhe kontratave të qirave; ai përdorte banesa të pronarëve që i kishin besuar agjencisë dhe u dorëzonte kontrata dhe pagesa qiraje të rreme. Farooq u ndalua gjithashtu për 10 vite nga detyra e drejtorit të një kompanie.
Uan Gogu, 42 vjeç, kishte rol qendror në ngritjen e ambienteve dhe organizimin e instalimit të pajisjeve hidroponike; ai ishte i përfshirë edhe në manipulime të paligjshme të matësve të energjisë, që kanë sjellë shpërthime zjarresh në tri prona; u dënua me 6 vite e 6 muaj burg. Zohaib Riaz Ali, 33 vjeç, akuzohet për blerjen e pajisjeve hidroponike dhe mori katër muaj burg të pezulluar për 12 muaj. Glentjan Sefaj, 29 vjeç, mori tetë muaj burg të pezulluar për 18 muaj për përfshirje në komplot. Mohammed Farooq, 76 vjeç, i përfshirë në pastrim parash pas blerjes me para në dorë të një prone që u përdor për kultivim, mori nëntë muaj burg të pezulluar për 12 muaj.
Detektivi kryeinspektor Simon Mullan tha se dënimet janë rezultat i goditjes së një rrjeti të organizuar që funksiononte në shkallë të gjerë dhe paralajmëroi pasojat përtej trafikut të drogës, duke përfshirë dëmtimet dhe amortizimin e pronave. “Operation Costello është i përkushtuar të identifikojë dhe godasë çdo pjesë të zinxhirit të krimit të organizuar, përfshirë ata që mundësojnë aktivitetin kriminal për përfitim financiar”, deklaroi Mullan, i cili bëri thirrje që qytetarët të raportojnë aktivitetet e dyshimta në lagjet e tyre.
