Malet, lumenjtë dhe bregdeti i jugut të Shqipërisë po zbulohen në një mënyrë të re për vizitorët e huaj: përmes udhëtimeve mbi kalë. Turistë nga vende të ndryshme të botës zgjedhin të eksplorojnë natyrën shqiptare duke përshkuar shtigje që i çojnë nga zonat malore deri pranë detit dhe rrjedhës së lumenjve. Për shumicën ky lloj turizmi nuk është thjesht një shëtitje me kalë, por një mënyrë për t’u afruar me natyrën, për të parë pejzahe dhe për të hyrë në zona më pak të prekura nga turizmi masiv.
Pjesëmarrësit shprehen se kalërimi u jep mundësinë të përjetojnë vendet ngadalë, në kontakt të drejtpërdrejtë me elementët natyrorë dhe me mjediset që shpesh mbeten jashtë rrugëve kryesore turistike. Disa vizitorë theksojnë gjithashtu interesin për fotografimin e peizazheve dhe dëshirën për të eksploruar sa më shumë vende gjatë qëndrimit. Një turiste shprehet: “Unë mendoj se do të qëndroj këtu, edhe pse nuk jam europiane. Më pëlqen të shkoj kudo dhe të fotografoj Shqipërinë, sepse natyra është e mrekullueshme dhe magjepsëse. Të shohësh gjithë këto vende mbi kalë është një bukuri e veçantë.”
Disa prej vizitorëve kanë zbuluar opsione të papritura për udhëtime me kalë gjatë kërkimeve online për itinerare në Europë. Një tjetër turiste thotë: “Po përpiqem të bëj udhëtime çdo vit dhe po kërkoja online për një udhëtim pesëditor në Europë. U surprizova kur gjeta mundësi kaq të mira për kalërim në Shqipëri. Nuk e mendoja se do të ishte një eksperiencë kaq e bukur, por tani e di që do të kthehem përsëri në Shqipëri.”
Për këta vizitorë, aventura nuk mbyllet me përfundimin e turit; përkundrazi, përvoja mbi kalë lë pas dëshirën për t’u kthyer sërish dhe për të eksploruar më shumë nga natyra e jugut të Shqipërisë në mënyrë të ngadaltë dhe të ndërvepruar.
