Kryeministri Edi Rama shprehu bindjen se Partia Socialiste do të realizojë hartën e re territoriale që parashikon krijimin e 46 bashkive, nga 61 që janë aktualisht. “Bashkimi do të bëhet sepse e thotë e gjithë teoria botërore, historia shqiptare, e thonë numrat dhe duhet ta mbyllim në 2031”, u shpreh ai gjatë takimeve me strukturat socialiste dhe qytetarët në Vlorë.
Rama sqaroi mënyrën e funksionimit të hartës së re dhe theksoi se nuk bëhet fjalë për shkrirje. Ai theksoi se shërbimet që aktualisht kryejnë bashkitë e vogla dhe qytetet do të vazhdojnë t’i kryejnë “përsëri njësoj”, duke mohuar se do të hiqeshin apo transferoheshin shërbime. “Askush nuk do t’i marrë me vete shërbimet. Sot, bashkitë e vogla nuk kryejnë një pjesë të madhe të funksioneve të tyre, sepse nuk kanë mjaftueshëm burime njerëzore”, tha Rama, duke argumentuar se mungesa e stafit është një nga arsyet e pamjaftueshmërisë në ofrimin e funksioneve nga njësitë e vogla.
Gjatë të shtunës, kryeministri zhvilloi gjithashtu takime në Gjirokastër, ku iu sqaroi qytetarëve planin e ri socialist dhe mori si shembull territorin e Libohovës për ilustrim të reformës territoriale. Në këto takime, Rama përsëriti synimin për realizimin e ndryshimeve brenda afatit që ai përmendi dhe përqendrimin në garantimin e vazhdimësisë së shërbimeve publike.
Takimi i Ramës në Vlorë u shoqërua me një protestë jashtë ambienteve të Pallatit të Kulturës, nga një grup qytetarësh që drejtoheshin nga Baki Goxhaj, i njohur si udhëheqës i protestave pro Palestinës. Sipas njoftimit, Baki Goxhaj u shoqërua në polici, bashkë me tre protestues të tjerë.
(Lajmi: Top Channel)
