Qytetarë po grumbullohen në sheshin “Skënderbeu” në Prishtinë për të marrë pjesë në “Marshin për Liri”, të organizuar nga iniciativa “Liria ka emër” si shenjë solidariteti me ish-krerët e Ushtrisë Çlirimtare të Kosovës që po përballen me procesin gjyqësor në Hagë. Marshimi është caktuar të nisë në orën 14:00, ndërsa Policia e Kosovës ka paralajmëruar bllokimin e përkohshëm të tri akseve kryesore në kryeqytet për mbarëvajtjen e ngjarjes: rrugës “Agim Ramadani”, “Luan Haradinaj” dhe “Enver Zymberi”.
Organizatorët kanë bërë të ditur se për ditën e sotme transporti publik dhe parkingjet në Prishtinë janë pa pagesë. Po ashtu, është siguruar transport falas nga të gjitha qytetet e Kosovës për qytetarët që dëshirojnë t’i bashkohen marshimit. Në shesh janë mbledhur tashmë pjesëmarrës, dhe pritet që numri i tyre të rritet deri në nisjen e marshimit.
Pjesëmarrës pritet të vijnë jo vetëm nga Kosova, por edhe nga Shqipëria dhe diaspora. Dhjetëra qytetarë nga qytete të ndryshme të Shqipërisë kanë kaluar përmes pikës kufitare të Morinës për të marrë pjesë, ndërsa në Prishtinë janë parë edhe shqiptarë që kanë ardhur nga Zvicra dhe vende të tjera. Organizatorët dhe autoritetet lokale duket se kanë marrë masa për organizimin dhe qarkullimin për shkak të praniës së pjesëmarrësve nga vende të ndryshme dhe për të siguruar rrjedhshmërinë e marshimit.
“Marshi për Liri” zhvillohet në prag të shpalljes së aktgjykimit për ish-krerët e UÇK-së, të cilët po gjykohen në Dhomat e Specializuara në Hagë. Ngjarja fokusohet në shfaqjen e solidaritetit publik me të pandehurit dhe në mobilizimin e qytetarëve për të marrë pjesë në aktivitetin që është planifikuar të ketë nisje masive në orën e përcaktuar. Top Channel.
