Ervin Demo është emëruar ministër i Brendshëm, pas vendimit të Kryeministrit Rama për ndryshimin në drejtimin e Ministrisë së Brendshme. Ai zëvendëson Besfort Lamallarin, i cili do të kalojë pranë Kryeministrisë si këshilltar i Ramës.
I lindur në Berat në vitin 1982, Demo ka një karrierë të lidhur me administratën publike, pushtetin vendor dhe arsimin e lartë. Prej shtatorit të vitit 2025 ai ka mbajtur postin e Ministrit të Shtetit për Pushtetin Vendor. Më parë, nga viti 2019 deri në vitin 2025, ka shërbyer si kryetar i Bashkisë Berat. Gjatë drejtimit të bashkisë, është angazhuar në përmirësimin e shërbimeve publike, zhvillimin dhe transformimin urban, rritjen e transparencës dhe nxitjen e pjesëmarrjes së qytetarëve në vendimmarrje. Një tjetër fokus i punës së tij ka qenë zhvillimi i turizmit në Berat.
Demo ka edhe një përvojë të gjatë në fushën akademike. Në vitet 2017–2018 ka mbajtur detyrën e zëvendësministrit të Arsimit, Sportit dhe Rinisë. Nga viti 2012 deri në vitin 2016 ka qenë zëvendësrektor i Universitetit të Tiranës. Që prej vitit 2004 është pedagog me kohë të plotë në Departamentin e Menaxhimit, në Fakultetin e Ekonomisë të Universitetit të Tiranës.
Formimi i tij akademik është zhvilluar pjesërisht jashtë vendit: ai ka kryer studimet universitare në Mbretërinë e Bashkuar, ku ka përfunduar bachelorin dhe masterin, dhe më pas ka ndjekur studime pasdoktorale në Universitetin e Bolonjës, në Itali, me fokus te menaxhimi dhe zhvillimi akademik.
Me kalimin në krye të Ministrisë së Brendshme, Demo merr një nga postet më të rëndësishme të qeverisë, pas një eksperience disa vjeçare në pushtetin vendor dhe në administratën publike.
