Më 8 shtator, një grup prej njëzet nëpunësish autorizues të gjykatave së bashku me kryetarët e Unionit të Gjyqtarëve, Shoqatës Kombëtare të Gjyqtarëve dhe Shoqatës së Prokurorëve depozituan kallëzim penal në SPAK kundër ministrit të Financave, Petrit Malaj, sekretarit të përgjithshëm Gentian Këri dhe drejtuesve të 16 degëve të Thesarit, duke kërkuar hetimin për bllokimin e pagave për muajin gusht. Kallëzuesit akuzojnë institucionet që kanë penguar ekzekutimin e pagesave për magjistratët.
Në reagimin e tij publik, Malaj mbrojti veprimet e Ministrisë së Financave dhe e konsideroi situatën si përshkallëzim të konfliktit mes pushtetit gjyqësor dhe ekzekutivit. Ai deklaroi se Ministria ka vepruar në përputhje me ligjin dhe ripërsëriti: “Të kallëzohesh sepse po zbaton ligjin, nga garantët e barazisë para ligjit!” Si arsyetim për bllokimin e pagesave, Malaj tha se ministria ka refuzuar të ekzekutojë shtesat e kërkuara pa një vendim të ri të Parlamentit, duke mos hapur “dyert e thesarit të shtetit për të nxjerrë që aty pa vendim të parlamentit një volum të konsiderueshëm parash, si shtesë rroge për gjyqtarët dhe prokurorët”.
Ministri theksoi se qeveria dhe përfaqësues të Parlamentit kanë deklaruar se nuk do të pengohet zbatimi i vendimit të Gjykatës Kushtetuese për pagat e magjistratëve, dhe se çështja pritet të adresohet më 17 shtator, kur parashikohet miratimi i ligjit që i jep Ministrisë së Financave kompetencat administrative për veprimin në këtë drejtim. Megjithatë, sipas tij, përfaqësuesit e pushtetit gjyqësor kanë zgjedhur të përshkallëzojnë përplasjen përmes kallëzimit penal.
Në deklaratën e plotë, Malaj gjithashtu bëri publik një krahasim të pagave aktuale dhe kërkuara sipas shkallëve: për shembull, “Gjyqtar i Shkallës së Parë” — “Është: 376, 381 Lekë” dhe “Kërkohet: 567,421 Lekë”; “Gjyqtar i Shkallës së Dytë” — “Është: 388,927 Lekë” dhe “Kërkohet: 586,335 Lekë”; “Gjyqtar i Grupit të III në GJKKO” — “Është: 659,920 Lekë” dhe “Kërkohet: 994,877 Lekë”. Sipas tij, efekti total në buxhet me këto kërkesa është 40 milionë euro shtesë në vit, ndërsa rishikimi i pagave për periudhën 2023–2026 do të kishte një efekt prej 125 milionë euro në buxhet.
Malaj i bëri thirrje drejtorëve të Thesarit dhe sekretarit të përgjithshëm të vazhdojnë të kryejnë detyrën pa u intimiduar dhe të ruajnë rigorozitetin në menaxhimin e financave të shtetit sipas ligjit.
