Mauricio Pochettino kërkon që Chelsea të privohen nga titulli i Premier League i fituar në 2017 dhe trofeu t’i akordohet Tottenhamit, pas pranimit nga klubi londinez të shkeljeve financiare. Ish-trajneri i Chelsea-t argumenton se skuadra e drejtuar atëherë nga Antonio Conte duhej ndëshkuar edhe në aspektin sportiv, ndërsa Tottenham, që mbylli sezonin në vendin e dytë, duhet shpallur kampion.
FA gjobiti Chelsea-n me 10 milionë paund pasi klubi pranoi 74 shkelje të rregullave të Federatës Angleze të Futbollit, përfshirë pagesa sekrete rreth 47 milionë paund ndaj agjentëve të paregjistruar gjatë periudhës 2011–2018, kur pronar ishte Roman Abramovich. Në atë periudhë në Chelsea luanin, ndër të tjerë, Eden Hazard, Willian dhe David Luiz; Hazard shënoi 16 gola në sezonin e titullit.
Pochettino, i cili drejtoi Tottenhamin për disa vite dhe e çoi klubin deri në finalen e Champions League, tha se rregullat duhet të jenë të njëjta për të gjithë. Ai deklaroi se tifozët e Chelsea-t “do të mërziten” me të për këtë qëndrimin dhe vuri në dukje se nëse një klub pranon se ka shkelur rregullat, titulli i Premier League duhet t’i takonte ekipit të dytë, përndryshe po nxiset shkelja e rregullave.
Tottenham e përfundoi atë sezon shtatë pikë pas Chelsea-t. Pochettino përmendi gjithashtu se skuadra e tij në atë sezon ishte “ekuip i vetëm në historinë e Premier League që shënoi më shumë gola dhe pësoi më pak se çdo skuadër tjetër në të njëjtin sezon, por nuk e fitoi titullin.” Ai theksoi se nuk po minimizon suksesin e Chelsea-t në fushë dhe punën e Antonio Contes, duke thënë se Conte ishte një trajner i madh dhe gjithçka funksionoi, por nëse ka pasur shkelje të rregullave, atëherë titulli duhet t’i jepet një skuadre tjetër.
Pochettino, i sapo-rinovuar për katër vjet si trajner i kombëtares së Shteteve të Bashkuara, deklaroi gjithashtu se është “gjithmonë i hapur” për një rikthim te Tottenham.
