Bashkimi Europian po përgatit rregulla të reja për qiratë afatshkurtra turistike të ofruara përmes platformave si Airbnb dhe Booking, me synimin për të frenuar rritjen e çmimeve dhe mungesën e banesave të përballueshme. Propozimi i Komisionit Europian nuk parashikon një ndalim të përgjithshëm në të gjithë BE-në, por u jep autoriteteve kombëtare dhe vendore një bazë ligjore të përbashkët për të kufizuar qiratë ditore vetëm në zonat ku provohet se ato po rëndojnë krizën e strehimit.
Një zonë mund të konsiderohet nën “presion strehimi” kur çmimi mesatar i një banese është i barabartë me të paktën tetë vite të ardhura të disponueshme për frymë dhe kur raporti mes çmimeve dhe të ardhurave ka ardhur duke u përkeqësuar gjatë dhjetë viteve të fundit. Nëse blerja e një shtëpie kërkon mbi dhjetë vite të ardhura, situata mund të klasifikohet drejtpërdrejt si kritike. Autoritetet duhet të marrin në shqyrtim edhe faktorë të tjerë, përfshirë rritjen e popullsisë, numrin e banesave të disponueshme dhe raportin mes ofertës dhe kërkesës, dhe duhet të provojnë se presioni mbi tregun nuk pritet të zbutet brenda tre viteve të ardhshme.
Në zonat e identifikuara si të stërmbingarkuara me presion strehimi, autoritetet mund të vendosin kufizime për numrin e apartamenteve turistike, të aplikojnë rregulla më të forta regjistrimi ose masa që frenojnë hapjen e njësive të reja. Çdo kufizim duhet të jetë i argumentuar, proporcional, i përkohshëm dhe i zbatueshëm vetëm në territorin ku ekziston problemi; ai nuk do të vendoset automatikisht nga Brukseli, por do të mbetet në dorën e qyteteve dhe qeverive vendore për zbatim.
Airbnb ka kundërshtuar qasjen e propozuar, duke pretenduar se shkaku kryesor i krizës së strehimit është mungesa e ndërtimeve dhe numri i lartë i banesave të pabanuara. Propozimi i Komisionit duhet të miratohet më tej nga Parlamenti Europian dhe vendet anëtare përpara se të bëhet ligj.
