Mauricio Pochettino, tani trajner i kombëtares amerikane dhe më parë në pankinën e Tottenham, kërkon që Chelsea t’i hiqet titulli i Premier League i sezonit 2016/17 dhe t’i akordohet Tottenham, pasi sipas tij Blutë kishin shkelur rregullat financiare. Në atë sezon Tottenham përfundoi i dyti, shtatë pikë pas Chelsea, dhe Pochettino thotë se nëse konstatimet janë të vërteta, Tottenham meriton të shpallet kampion.
Në korrik, Chelsea u gjobit me 10 milionë paund dhe u dënua me një skualifikim me kusht për dy ndeshje pas pranimit të 74 shkeljeve të rregullave të Federatës Angleze lidhur me agjentët, bashkëpunimet me ndërmjetësit dhe investimet e palëve të treta në transferime. Vendimi i referohet periudhës kur në krye të klubit ishte Roman Abramovich. Pronaret aktualë, Todd Boehly dhe Clearlake Capital, bëjnë muaj më parë një vetëdenoncim te autoritetet pasi ishin pranë blerjes së klubit nga Abramovich, duke pranuar gjithashtu shkelje të normave.
Autoritetet vunë në dukje se disa transferime me ndikim në suksesin e sezonit 2016/17 ishin subjekt i këtyre shkeljeve, përfshirë blerjen e Eden Hazard, Willian, David Luiz dhe Nemanja Matic, lojtarë që luajtën rol të rëndësishëm në triumfin nën drejtimin e Antonio Contes.
Pochettino ka deklaruar se nëse akuzat janë të vërteta, titulli duhet t’i hiqet Chelsea dhe t’i jepet skuadrës së vendit të dytë, duke argumentuar se konkurrenca nuk ka qenë e barabartë dhe se Tottenham mund të kishte përmirësuar skuadrën po të kishte pasur të njëjtat mundësi. Ai shtoi se nuk ka frikë të thotë të vërtetën dhe pranoi se deklaratat mund t’i zemërojnë tifozët e Chelsea, por se do ta thoshte të njëjtën gjë edhe nëse do të ishte Tottenham që kishte thyer rregullat. Për kujtesë, Pochettino ka drejtuar gjithashtu Chelsea në sezonin 2023-24.
