Djali i presidentit serb Aleksandar Vuçic, Danilo, mori pjesë në ceremoninë mortore të Ratko Mlladiçit, të njohur si “Kasapi i Ballkanit”, i cili është dënuar nga drejtësia ndërkombëtare për krime lufte dhe genocid. Danilo shoqërohej nga disa persona që mbanin bluza me portretin e Mlladiçit. Në ceremoni ishte i pranishëm edhe Milorad Dodik, një nga figurat kryesore politike të Republikës Serbe në Bosnje e Hercegovinë. Po ashtu morën pjesë disa ministra të qeverisë serbe, përfshirë ministrin e Drejtësisë, Nikola Vujiç.
Aleksandar Vuçic nuk mori pjesë në varrim, duke arsyetuar mungesën me vizitën e presidentit të Kazakistanit në Beograd. Arkivoli i Mlladiçit, i cili vdiq më 27 gusht në Hagë ndërsa po vuante dënimin me burgim të përjetshëm, u vendos në Kishën e Shën Lukës. Ceremoninë mortore e udhëhoqi kreu i Kishës Ortodokse Serbe, Patrijarku Porfirije. Gjatë shërbesës, pjesëtarë të gardës së nderit të Ushtrisë së Serbisë bënë roje, ndërsa u përcollën lutje që “gjeneralit t’i faleshin mëkatet e bëra me dashje dhe pa dashje”.
Patrijarku Porfirije deklaroi se emri i Mlladiçit “do të mbetet thellë i ngulitur në kujtesën dhe lutjet e pjesës më të madhe të popullit serb dhe ortodoks, që ushqen mirënjohje të thellë ndaj tij”. Nderimet për Mlladiçin u mbajtën pavarësisht paralajmërimeve dhe reagimeve ndërkombëtare.
Senatorët amerikanë Jeanne Shaheen, Chuck Grassley dhe Keith Self nxorrën një deklaratë të përbashkët, ku kujtuan përgjegjësinë e tij për gjenocidin dhe krimet e tjera në Bosnje e Hercegovinë, duke theksuar se ato përbëjnë disa prej krimeve më çnjerëzore të kryera në Europë që nga Lufta e Dytë Botërore. Më herët, Komisionarja europiane për Zgjerim, Marta Kos, anuloi vizitën e planifikuar në Serbi, duke thënë se glorifikimi i një personi të dënuar për krime lufte dhe genocid është “i papajtueshëm me vlerat mbi të cilat bazohet rruga drejt BE-së”.
