Masat fleksibile të vendosura nga Brukseli për zbatimin e sistemit të ri të hyrje‑daljeve, EES, skaduan më 6 shtator, duke rritur rrezikun që udhëtarët që hyjnë në Bashkimin Europian të përballen përsëri me radhë të gjata në kufi. Kompanitë ajrore i kanë kërkuar Komisionit Europian një zgjatje të këtij afati deri në fund të vitit, por burime të shumta të cituara nga The Guardian tregojnë se disa shtete anëtarë mund të rikthejnë kontrollet biometrike gradualisht.
Gjatë sezonit veror përfundimisht nuk u regjistruan pritje të gjera në shumë aeroporte evropiane, megjithatë në rastet më të këqija pati humbje fluturimesh nga ana e pasagjerëve. Industria e aviacionit vlerëson se kaosi u shmang kryesisht për shkak të lehtësimit të rregullave që kërkonin mbledhjen e të dhënave biometrike, përfshirë marrjen e gjurmëve të gishtërinjve për qytetarët që nuk vijnë nga vendet e BE-së.
Luke Petherbridge, drejtori i çështjeve publike në entin tregtar të industrisë së udhëtimeve në Mbretërinë e Bashkuar, Abta, tha se po vazhdonte të shtyjë Komisionin Europian për të lejuar pezullimin e kontrolleve kufitare përtej shtatorit, “duke pranuar se ka ende shumë rrugë për të bërë derisa EES-ja të jetë në funksionim në të gjitha vendet pjesëmarrëse”. Kërkesa e kompanive ajrore dhe shqetësimet e organizatave të udhëtimeve reflektojnë sfidat e koordinimit ndërmjet shteteve anëtare për nisjen e plotë të sistemit.
Përveç çështjeve politike dhe rregullatore, problemet teknike vazhdojnë të pengojnë zbatimin e EES. Në pika kyçe kalimi mes Mbretërisë së Bashkuar dhe Francës — përfshirë Eurotunnel, Portin e Doverit dhe terminalin e Eurostar në St Pancras — pajisjet për regjistrimin biometrik ende nuk janë plotësisht funksionale. Kjo situatë tregon se, edhe pse masat lehtësuese shmangën probleme të mëdha gjatë verës, nisma për implementimin e EES mbetet e paplotësuar dhe rihapja e kontrolleve mund të prodhojë vonesa dhe shqetësime për udhëtarët.
