Një zjarr ka dëmtuar një nënstacion elektrik në Berlin dhe policia po heton nëse ngjarja ishte një përpjekje për sabotim të rrjetit energjetik, njoftoi ajo të hënën. Zjarri shpërtheu në lagjen Moabit, ku u prekën një kantier ndërtimi dhe “një pjesë e një nënstacioni elektrik”, tha policia në një postim në WhatsApp dhe në një njoftim të shpërndarë në mediat sociale. Autoritetet thanë se nuk ka probleme me furnizimin me energji elektrike dhe po shqyrtojnë nëse zjarri ka qenë rezultat i zjarrvënies së qëllimshme apo i një defekti teknik.
Policia raportoi se forcat e emergjencës u alarmuan rreth orës 02:40 dhe se Zjarrfikësja e Berlinit ndërhyri në vendngjarje. Hetuesit e policisë kriminale po punojnë në vendngjarje për të përcaktuar shkaqet dhe rrethanat e ngjarjes.
Autoritetet gjermane kërkojnë gjithashtu një burrë 48-vjeçar, të përshkruar nga ta si një aktivist “ekstremist” për klimën, i dyshuar për disa sulme ndaj infrastrukturës. Sipas njoftimeve, i dyshuari i ka dërguar dy letra mediave gjermane, në të cilat ka marrë përgjegjësinë për disa sulme.
Në Saksoni, prokurorët thanë se si pjesë e hetimeve për sulmet në rrjetin energjetik janë gjetur 21 pajisje shpërthyese afër kabllove të tensionit të lartë. Të gjitha këto pajisje janë neutralizuar dhe hetimet vazhdojnë. Policia dhe prokurorët po vijojnë të verifikojnë lidhjet mes akteve të ndryshme dhe autorëve të dyshuar.
Autoritetet po vërejnë një rritje të përpjekjeve për sabotim dhe sulme hibride ndaj sistemit energjetik të Gjermanisë në periudhën e fundit. Disa prej këtyre veprimeve i janë atribuuar aktivistëve të krahut të majtë ose ambientalistëve, ndërsa të tjerat janë lidhur me interesa të huaja, përfshirë Rusinë. Në ditët e fundit, disa objekte në North Rhine-Westphalia dhe Brandenburg janë shënjestruar, sipas njoftimeve zyrtare.
