Ish-presidenti kubanez Raúl Castro është shfaqur sërish në publik në moshën 95-vjeçare, më pak se një muaj pas paraqitjes së tij të fundit në Havana, gjatë ceremonisë për 100-vjetorin e lindjes së vëllait të tij të ndjerë, Fidel Castro. Televizioni shtetëror transmetoi pamje nga një event ku ai mori pjesë gjithashtu me rastin e 65-vjetorit të themelimit të një njësie të Ministrisë së Brendshme, përgjegjëse për sigurinë personale të udhëheqësve kubanë, përfshirë Fidel Castron.
I shoqëruar nga nipi i tij, Raúl Guillermo Rodríguez Castro, që drejton këtë njësie të sigurisë personale, ish-presidenti përshëndeti disa veteranë të shërbimit. Në pamje ai shfaqet i veshur me uniformën ushtarake jeshile dhe dukej energjik, sipas transmetimit të televizionit shtetëror.
Raúl Castro ka drejtuar Kubën nga viti 2006 deri në vitin 2018. Edhe pse nuk mban më poste zyrtare në qeveri apo në Partinë Komuniste, ai vazhdon të ketë ndikim të rëndësishëm në vendimmarrjen politike dhe ruan lidhje të forta me ushtrinë.
Në qershor, presidenca kubaneze njoftoi miratimin e një pakete reformash ekonomike që synojnë transformimin e ekonomisë dhe përballimin e krizës së thellë ekonomike që po ndikon vendin. Masat janë përshkruar si ndryshimi më i madh në modelin ekonomik të Kubës që nga vendosja e sistemit komunist rreth shtatë dekada më parë.
Ndërsa zhvillimet e fundit politike dhe shtetërore vijojnë, në maj Raúl Castro u padit në Shtetet e Bashkuara lidhur me vdekjen e katër shtetasve amerikanë në vitin 1996, kur dy avionë të vegjël që transportonin anëtarë të një organizate anti-Castro u rrëzuan. Në atë kohë, Castro mbante postin e ministër të Mbrojtjes së Kubës.
