Edhe pse temperaturat e larta të këtyre ditëve kanë orientuar pjesën më të madhe të turistëve drejt plazheve, Apolonia dhe Bylisi mbeten dy nga destinacionet kryesore të turizmit kulturor në jug të Shqipërisë. Çdo ditë vizitorë vendas dhe të huaj ndalojnë në këto qytete antike për t’u njohur me historinë, monumentet dhe gjurmët e qytetërimeve të lashta. Në Parkun Arkeologjik të Apolonisë interesi i turistëve vazhdon të jetë i lartë.
Disa turistë të huaj qëndrojnë në vend për të vizituar më shumë vende brenda vendit; një prej tyre thotë: “Është hera e parë që vijmë në Shqipëri. Kemi shkuar në Tiranë, më pas në mal dhe tani jemi kthyer në jug për të vizituar Apoloninë. Është një vend shumë i bukur dhe me shumë histori. Në Shqipëri na pëlqen ushqimi dhe shpresojmë të kthehemi përsëri”. Një tjetër thekson mikpritjen dhe vlerat historike: “Më pëlqen shumë Shqipëria, njerëzit janë shumë mikpritës, ushqimi shumë i mirë, ka shumë vende historike interesante. I sugjeroj të gjithëve të vijnë dhe ta vizitojnë”.
Sipas arkeologut Arjan Dimo, krahasuar me një vit më parë është shënuar një rritje e vazhdueshme e numrit të vizitorëve, duke treguar një interes në rritje për trashëgiminë kulturore të zonës. Përveç Apolonisë, Parku Arkeologjik i Bylisit përbën një tjetër pikë të rëndësishme të turizmit kulturor në jug. Aty ka nisur ndërtimi i një qendre multifunksionale, e cila do të përfshijë muzeun dhe shërbime të tjera për vizitorët, ndërhyrje që pritet të rrisin ndjeshëm interesin dhe numrin e turistëve.
Gjatë muajve të verës turizmi detar dhe ai malor mbeten më të preferuarit për shkak të temperaturave të larta, por edhe në këtë periudhë Apolonia dhe Bylisi vazhdojnë të tërheqin vizitorë. Kështu turizmi kulturor po fiton gjithnjë e më shumë hapësirë, dhe dy qytetet antike mbeten sot pika referimi për trashëgiminë kulturore dhe historinë e Shqipërisë, duke ofruar turistëve një udhëtim unik mes monumenteve dhe gjurmëve të antikitetit.
