Shpërthimi i vullkanit Anak Krakatau ka shkaktuar ndërprerje të mëdha në transportin ajror në Indonezi, duke detyruar pezullimin e 209 fluturimeve në Aeroportin Ndërkombëtar Soekarno-Hatta të Xhakartës. Hiri vullkanik u zbulua në hapësirën ajrore pranë aeroportit të dielën në mëngjes dhe preku më shumë se 22 mijë pasagjerë, ndërsa ndërprerjet kanë ndikuar kryesisht linjat drejt dhe nga Singapori dhe edhe fluturimet për dhe nga Doha, Sidnei e Kuala Lumpur. Pezullimi i operacioneve është zgjatur deri në orën 13:30.
Anak Krakatau nisi aktivitetin e fuqishëm vonë të premten, me shpërthime të njëpasnjëshme, aktivitet sizmik, burime lave dhe zhurma të forta të raportuara në zonat përreth. Autoritetet njoftuan se u regjistruan dy shpërthime të tjera herët të dielën. Deri më tani nuk ka paralajmërim për cunami si pasojë e aktivitetit të fundit të vullkanit.
Hiri ka shkaktuar probleme edhe për banorët e zonave pranë vullkanit; Ministria e Shëndetësisë u ka bërë thirrje qytetarëve të qëndrojnë brenda dhe të përdorin maska për t’u mbrojtur nga irritimet e syve, të lëkurës dhe të rrugëve të frymëmarrjes. Disa shkolla kanë anuluar aktivitetet pasi nxënës dhe banorë kanë raportuar irritim të syve, dhe peshkatarët kanë pezulluar daljet në det për shkak të pranisë së hirit.
Anak Krakatau, i njohur si “Fëmija i Krakatoas”, ndodhet në Ngushticën Sunda mes ishujve Java dhe Sumatra. Vullkani fitoi vëmendje të madhe pas shembjes së një pjese të tij në dhjetor 2018, ngjarje që shkaktoi një cunami dhe vrau më shumë se 400 persona. Indonezia vetë ndodhet në Unazën e Zjarrit të Paqësorit, një nga zonat më aktive në botë për tërmete dhe shpërthime vullkanike.
