Zjarri i nisur mesditën e sotme në fshatin Vadhizë të Fierit mori përmasa të mëdha brenda pak orësh nga shpërthimi i vatrës së parë. Siç raporton korrespondenti i Top Channel Neritan Trifoni, flakët nisën në Vadhizë dhe avancuan drejt Levanit; sipas banorëve janë djegur tre shtëpi, një magazinë që prodhon koshere bletësh dhe flakët i janë afruar një biznesi. I favorizuar nga era e fortë dhe temperaturat e larta, zjarri u përhap shpejt, duke përfshirë sipërfaqe me ullishte, pyje me pisha, shkurre dhe objekte banimi.
Në orët e pasdites flakët iu afruan dy lokaleve pranë liqenit, në zonën e Qafës së Koshovicës; një lokal dhe një shtëpi e pabanuar u përfshinë nga zjarri. Ndërhyrja e forcave zjarrfikëse ishte e menjëhershme, por era e fortë shpërndau flakët në një perimetër të gjerë dhe vështirësoi ndërhyrjen nga toka. Për ndihmë u angazhuan edhe dy helikopterë që ndërhynë nga ajri për neutralizimin e vatrave më problematike.
Flakët kaluan rrugën nacionale Fier–Levan, duke detyruar policinë të bllokojë përkohësisht qarkullimin për shkak të rrezikut dhe tymit të dendur. Zjarri vazhdoi të përparojë duke djegur pyllin e dendur dhe u drejtua me shpejtësi drejt fshatit Peshtan i Vogël. Për shkak të afrimit të flakëve pranë zonave të banuara, forca të shumta policie nisën evakuimin e banorëve; rreth 15 familje janë larguar nga banesat e tyre, ndërsa efektivët vazhdojnë të monitorojnë zonat ku zjarri paraqet rrezik për shtëpitë.
Gjatë përhapjes u krijuan edhe disa vatra të tjera, çka e bëri menaxhimin e situatës më të vështirë. Forca të shumta zjarrfikëse nga Fier, Mallakastra, Lushnja, Vlora dhe Berati, së bashku me policinë dhe strukturat e tjera të emergjencave, ndodhen në terren në operacionin për shuarjen e zjarrit. Operacioni vijon, ndërsa situata mbetet kritike për shkak të erës së fortë që favorizon përhapjen e shpejtë të flakëve drejt zonave të tjera.
