Autoritetet e Kosovës kanë vendosur të përfshijnë Jozefin Markun, ish-banorin e Big Brother Vip Albania, në listën e personave që duhet të ndalohen në kufi pas një incidenti të dhunshëm me shtetasin kosovar Edi Kuçi, ish-konkurrent i Përputhen. Vendimi u mor pas hapjes së një rasti penal lidhur me përleshjen fizike, ndërsa pamjet e plota të ngjarjes janë publikuar së fundmi në rrjetet sociale.
Lajmi u konfirmua nga zëdhënësi i Prokurorisë Themelore në Pejë, Shkodran Nikçi. Sipas tij, prokurori nga kjo prokurori, me vetiniciativë, ka hapur rast penal ndaj J.M., shtetas i Republikës së Shqipërisë, për veprën penale “Lëndim i lehtë trupor”, e dyshuar se i është shkaktuar shtetasit të Republikës së Kosovës, E.K. (inicialet që i referohen Edi Kuçit).
Prokuroria ka autorizuar Policinë e Kosovës për inicimin e rastit, përfshirjen e të dyshuarit në listën kufitare për kontroll të veçantë (stop-listë) dhe ndërmarrjen e veprimeve të tjera ligjore. Zyrtarët shpjeguan se veprimet janë ndërmarrë në bazë të nenit 109 të Kodit Penal të Republikës së Kosovës, i cili sipas tyre zbatohet edhe ndaj shtetasve të huaj për vepra penale të kryera jashtë territorit të Kosovës ndaj shtetasve të saj.
Rasti lidhet me një incident në autostradën Tiranë-Durrës. Pamjet, të siguruara nga Top Channel, tregojnë momentet para dhe gjatë përleshjes fizike. Në video shihet Edi Kuçi i ndaluar në rrugë përmes një tabele të improvizuar me mbishkrimin “Stop”, dhe më pas përballja me Jozefin Markun, i cili e godet fizikisht. Gjatë incidentit dëgjohet Marku duke i thënë Kuçit: “Pse m’ke shajt? Shaje Gjestin, shaje Gjestin”, ndërsa vazhdon ta godasë. Në pamje, Kuçi shihet i gjakosur dhe i kërkon të ndalojë.
Në përfundim të përleshjes, Marku i kërkon Kuçit të ulet në gjunjë dhe t’i kërkojë falje. Publikimi i videos së plotë ka shkaktuar reagime të shumta në rrjetet sociale. Me hapjen e rastit penal dhe vendosjen në stop-listë, autoritetet e Kosovës kanë ndërmarrë hapat e parë ligjorë; çështja pritet të vijojë të trajtohet nga organet kompetente. Top Channel.
