Reshjet e breshërit të një dite më parë shkaktuan dëme në rreth 40 hektarë sipërfaqe bujqësore në Devoll. Sipas të dhënave të Bashkisë Devoll, specialistët e Drejtorisë së Bujqësisë kanë nisur monitorimin në terren për të evidentuar dëmet dhe po kryejnë inspektime për përcaktimin e saktë të pasojave.
Në njësinë administrative Miras, në fshatrat Braçanj dhe Dobranj, dëmet e konstatuara deri tani llogariten në rreth 40% të sipërfaqeve të prekura. Kultura më e dëmtuar resulton të jetë fasulja: vetëm në fshatin Dobranj janë evidentuar rreth 30 hektarë të mbjella me këtë kulturë, me një nivel dëmtimi që varion nga 50% deri në 60%. Përveç fasules, janë konstatuar dëmtime edhe në kultura të tjera, mes të cilave qepa, molla dhe perimet.
Inspektimet në terren do të vijojnë gjatë tre ditëve të ardhshme, me qëllim përcaktimin e sipërfaqeve të plota të dëmtuara dhe përditësimin e të dhënave mbi pasojat e reshjeve. Monitorimi i specialistëve synon evidentimin e dëmeve në nivel fushor dhe përmbledhjen e informacioneve që do të shërbejnë për vlerësimin e dëmeve dhe hartimin e masave të nevojshme.
Bashkia Devoll dhe Drejtoria e Bujqësisë po koordinojnë inspektimet në terren për të mbledhur të dhënat e nevojshme mbi përqindjen e dëmtimeve dhe sipërfaqet konkretisht të prekur në çdo fshat të njësisë administrative. Nga informacionet fillestare rezulton se ndikimi është më i fortë në fasule dhe se dëmtimet në pjesën tjetër të kulturave janë të shpërndara, por pritet përditësimi i të dhënave pas përfundimit të inspektimeve treditore për të pasur një pasqyrë të plotë mbi humbjet e shkaktuara nga breshëri.
