Ministria e Shëndetësisë në Gaza, e drejtuar nga Hamasi, raporton se më shumë se 900 palestinezë janë vrarë në Rripin e Gazës gjatë këtij viti, pavarësisht marrëveshjes së armëpushimit. Sipas të dhënave të ministrisë, që nga hyrja në fuqi e armëpushimit më 10 tetor numri i përgjithshëm i të vrarëve ka kaluar 1,300, përfshirë 301 fëmijë. Marrëveshja e armëpushimit u arrit pasi Hamasi dhe Izraeli pranuan planin 20-pikësh të paqes të Presidentit amerikan Donald Trump, i cili parashikonte ndërprerjen e të gjitha operacioneve ushtarake, përfshirë bombardimet ajrore dhe të artilerisë.
Megjithatë, ministria thotë se sulmet vdekjeprurëse kanë vijuar edhe pas armëpushimit. Muajt e fundit shënuan disa nga numrat më të lartë të viktimave: më shumë se 100 persona u regjistruan të vrarë çdo muaj nga prilli deri në gusht. Numri më i lartë mujor u regjistrua në korrik, me 152 të vrarë, përfshirë 21 fëmijë. Vetëm gjatë pjesës së mbetur të muajit tetor, pas hyrjes në fuqi të armëpushimit, ministria raportoi 251 viktima.
BBC Verify ka analizuar dhjetëra video që dokumentojnë pasojat e sulmeve në zona të ndryshme të Gazës, duke përfshirë një kafene pranë plazhit, tenda ku janë strehuar persona të zhvendosur dhe një procesion funeral në Gazën qendrore. Ministria e Shëndetësisë ia atribuojnë këto vdekje veprimeve ushtarake izraelite, por të dhënat e saj nuk bëjnë dallim mes civilëve dhe luftëtarëve.
Shifrat e ministrisë janë kundërshtuar nga Izraeli, ndërsa OKB-ja i konsideron ato të besueshme. Ekspertë të intervistuar nga BBC Verify deklaruan se analizat e tyre të pavarura janë në përputhje me të dhënat e ministrisë. Forcat e Mbrojtjes të Izraelit (IDF) kundërshtojnë shifrat dhe thonë se nuk ka bazë për të supozuar se të gjithë personat e listuar janë vrarë si pasojë e aktiviteteve të forcave izraelite. IDF shton se operon në mënyrë të synuar për të eliminuar kërcënimet dhe për të mbrojtur trupat dhe civilët izraelitë, duke respektuar marrëveshjen e armëpushimit dhe duke marrë masa për të kufizuar dëmet ndaj civilëve sa më shumë që është e mundur.
