Gjatë një takimi të zhvilluar nga Kryeministri Edi Rama dhe Ministrja Delina Ibrahimaj me Inspektoratin e Përgjithshëm dhe inspektoratet qendrore, Inspektori i Përgjithshëm, Dashnor Sula, theksoi rikonceptimin e qasjes së inspektorateve dhe trupave inspektuese ndaj bizneseve, duke bërë të qartë se diskutimi nuk ishte i fokusuar mbi zbatimin e kuadrit ligjor, por mbi mënyrën si duhet të kryhen inspektimet. Sula deklaroi prerë se nuk do të tolerohen inspektime që kryhen në kundërshtim me rregullat dhe procedurat ligjore.
Në fjalën e tij ai nënvizoi nevojën për një proces inspektimi transparent dhe të rregullt, në përputhje me ligjin, duke theksuar se synimi është shmangia e çdo forme abuzimi ndaj subjekteve dhe qytetarëve. Sula u shpreh se “Inspektorati i Përgjithshëm nuk do të tolerojë asnjë inspektim që bëhet pa paralajmërim dhe jashtë programit të inspektimit. Nuk do të lejojmë asnjë shkelje ligjore”, duke përsëritur pritshmëritë për respektimin e procedurave dhe programeve të miratuara për inspektime.
Në videomesazhin e tij, Inspektori i Përgjithshëm iu drejtua gjithashtu qytetarëve, duke i ftuar të denoncojnë çdo rast kur pretendojnë se janë përballur me sjellje abuzive nga inspektorët ose me inspektime të kryera në mënyrë të parregullt. Ai sqaroi se çdo qytetar që konstatojnë apo pretendojnë një rast të tillë mund të i drejtohet Inspektoratit të Përgjithshëm përmes mekanizmave të ankimit, në mënyrë që rastet të verifikohen dhe të merren masat përkatëse.
Mesazhet e kreut të Inspektoratit vijnë brenda përpjekjeve për rritjen e transparencës dhe standardizimin e procesit të inspektimit, me synim që kontrollet të kryhen vetëm në përputhje me procedurat dhe detyrimet që përcakton ligji.
