Argjentina synon të rikthehet në kalendarin e botërorit të Formula 1 pas 28 vitesh mungesë, njoftoi presidenti Javier Milei gjatë fjalës së mbajtur në kongresin e FIA në Buenos Aires. Ai theksoi se vendi, që po pret përsëri një ngjarje të tillë të FIA-së, i plotëson kushtet për të organizuar përsëri një Çmim të Madh dhe se pasioni për garat automobilistike në vend nuk ka shuar.
Milei rikujtoi se hera e fundit që u zhvillua një Çmim i Madh në Argjentinë ishte në vitin 1998, në autodromin Galvez, dhe nënvizoi lidhjen e fortë të argjentinasve me automobilizmin. Në fjalën e tij ai tha se “Argjentina që po kthehet të presë një kongres të FIA, është i njëjti vend që i mbledh të gjitha kushtet për të pritur përsëri Formula 1. Argjentina është një vend që i dashuron makinat. Herën e fundit që është mbajtur një Çmim i Madh në Argjentinë, ka qenë në vitin 1998 në autodromin Galvez, por gjatë gjithë kësaj kohe, pasioni i argjentinasve për garat nuk është shuar kurrë; e vetmja gjë që i ka munguar në këto 28 vitet e fundit, është që bota të kthehet të na shohë si një vend që është në gjendje të organizojë një Çmim të Madh.”
Përveç përmendjes së traditës dhe entuziazmit publik, presidenti theksoi rëndësinë e kapaciteteve institucionale, duke nënvizuar se vendi ka arritur nivelin e seriozitetit të nevojshëm për të qenë kandidat serioz për një garë të kampionatit më të rëndësishëm të garave automobilistike. Ai vlerësoi se Argjentina disponon jo vetëm traditën dhe pilotët, por tani edhe seriozitetin institucional të kërkuar përpara përzgjedhjes së një vendi pritës.
Milei përfundoi duke e paraqitur kongresin si një hap të parë drejt këtij rikthimi: “Kemi traditën, kemi pilotët dhe tani kemi edhe seriozitetin institucional që kërkon kjo kategori përpara se të zgjidhet një vend. Është momenti të hapim gazin në këtë drejtim dhe ky kongres përfaqëson hapin e parë drejt këtij rikthimi.”
