Lionel Messi nuk do ta veshë më fanellën e Kombëtares së Argjentinës. Ylli i “Albiceleste”, tashmë 39 vjeç, bëri zyrtar vendimin përmes një letre personale që, sipas tij, ishte shkruar dy ditë pas finales së fundit të Botërorit. Humbja ndaj Spanjës në New Jersey ishte ndeshja e tij e fundit me përfaqësuesen argjentinase.
Udhëtimi i Messit me Kombëtaren ka qenë i gjatë dhe i pasur me trofe. Me Argjentinën ai fitoi 1 Kupë Bote (Katar 2022), 2 Copa América (2021 dhe 2024), 1 medalje ari olimpike (Pekin 2008), 1 Finalissima (2022) dhe 1 Kupë Bote U20 (2005). Përtej trofeve, shifrat personale të Messit me fanellën e Argjentinës janë të spikatura: që nga debiti në gusht 2005, kur ishte 18 vjeç dhe u aktivizua nën drejtimin e José Pékerman, ai zhvilloi 207 ndeshje me Kombëtaren A, realizoi 125 gola dhe dha 68 asistime. Ky kapitull përfshin më shumë se dy dekada karrierë dhe kulmoi me triumfin historik në Botërorin e Katarit në 2022 dhe më pas me fitoren e Copa América 2024.
Largimi i Messit lë një boshllëk të madh te Kombëtarja e Argjentinës. Numri 10 ka qenë për vite me radhë lideri, kapiteni dhe lojtari rreth të cilit është ndërtuar skuadra. Rruga e tij me përfaqësuesen nuk ka qenë gjithmonë e drejtë: në një moment Messi njoftoi tërheqjen nga përfaqësuesja, por më pas u rikthye dhe vazhdoi të luftonte për trofetë që i mungonin. Në fund, ai arriti të fitonte Kupën e Botës në 2022 dhe edhe një tjetër Copa América më 2024.
Pas më shumë se 20 vitesh, 207 ndeshjesh, 125 golash dhe një koleksioni trofesh ndërkombëtarë, epoka e Lionel Messit me fanellën e Argjentinës duket se ka marrë fund. Top Channel.
