Kina paralajmëron për rrezik të lartë për një tjetër përmbytje pranë kufirit me Nepalin, pasi rrëshqitjet e dheut kanë formuar një liqen të ri natyror. Mbetjet e shembjeve kanë bllokuar rrjedhën e lumenjve Chhochen Khola dhe Purepu Tsangpo, duke bërë që uji të grumbullohet pas barrierës së krijuar nga dheu dhe shkëmbinjtë. Deri të premten, liqeni kishte akumuluar rreth 2.5 milionë metra kub ujë, ndërsa pritet që niveli të rritet për shkak të reshjeve.
Autoritetet kineze frikësohen se nëse barriera natyrore nuk i përballon presionit të ujit, liqeni mund të dalë nga shtrati dhe të shkaktojë një valë të re përmbytjesh dhe rrëshqitjesh dheu në zonat përreth. Paralajmërimi vjen pak ditë pas një përmbytjeje të fuqishme në të njëjtin rajon, që shkaktoi qindra viktima dhe persona të zhdukur. Sipas shkencëtarëve, kjo katastrofë e mëparshme mund të ketë qenë pasojë e shembjes së një akullnaje, që çliroi sasi të mëdha uji dhe mbetjesh që u përhapën përgjatë lumit.
Për shkak të rrezikut të situatës, autoritetet kineze kanë pezulluar përkohësisht disa operacione shpëtimi, ndërsa ekipet inxhinierike monitorojnë vazhdimisht nivelin e ujit dhe stabilitetin e liqenit. Në vëzhgim po përdoren edhe dronë për të identifikuar ndryshime që mund të tregojnë çarje ose shembje të barrierës natyrore. Megjithatë, zyrtarët shprehin se nuk çdo rritje e nivelit të ujit do të rezultojë domosdoshmërisht në një katastrofë: ekziston mundësia që uji të gjejë gradualisht një rrugë natyrore për t’u larguar, duke ulur presionin dhe duke shmangur përmbytje të menjëhershme.
Ndërkohë, edhe autoritetet në Nepal kanë marrë masa parandaluese, duke kërkuar nga banorët të qëndrojnë larg lumenjve Bhote Koshi dhe Trishuli. Paralajmërimet për sigurinë erdhën për shkak të mundësisë së bllokimeve të rrjedhave dhe rritjes së nivelit të ujit, që mund të shkaktojnë përmbytje të tjera në zonat poshtë bllokimeve.
