Detaje të reja ngrejnë pikëpyetje mbi vendimin që lejoi nisjen e katamaranit “Filo Jet” me 279 persona nga Kyrenia drejt Qipros, pavarësisht kushteve atmosferike të pafavorshme. Pak minuta pas largimit nga porti, mjeti nisi të marrë ujë dhe u përmbys. Sipas kryeministrit të administratës turko-qipriote në veri të Qipros, Unal Ustel, autoriteti përgjegjës për portet fillimisht kishte ndaluar nisjen për shkak të motit, por rreth një ore më vonë ndryshoi vendimi dhe “Filo Jet” mori lejen për të lundruar drejt Tasuxhusë, në provincën e Mersinit, në Turqi.
Pak kohë pas daljes nga porti, kur ndodhej rreth katër milje detare larg bregut, katamarani nisi të marrë ujë, pësoi një anim të madh, u përmbys dhe më vonë u fundos në një thellësi prej rreth 514 metrash. Vendimi për të lejuar lundrimin, vetëm një orë pasi mjeti ishte ndaluar për shkak të motit, ka shkaktuar reagime dhe pikëpyetje të shumta në veri të Qipros.
Gazetarja turko-qipriote Aisemden Akin ka kërkuar që të bëhen publike dokumentet që lidhen me nisjen e katamaranit, përfshirë urdhrin e largimit, raportet e inspektimit dhe autorizimin për kryerjen e linjës. Akin kërkon gjithashtu sqarim se kush firmosi përfundimisht lejen e nisjes, në një kohë kur kushtet atmosferike ishin arsyeja fillestare për ndalimin e katamaranit.
“Departamenti i Porteve”, i cili mban përgjegjësi për kontrollet përkatëse, është nën varësinë e ministrit përgjegjës për Transportin, Erhan Arikli. Vëmendja është përqendruar te zinxhiri i vendimmarrjes që çoi në largimin e “Filo Jet” nga porti dhe te arsyet dhe të dhënat mbi të cilat u bazua ndryshimi i vendimit brenda një ore.
Në këtë kontekst, autoritetet kërkohen të sqarojnë procedurat dhe përgjegjësitë lidhur me dhënien e lejes për nisje. Hetimet e paralajmëruara pritet të hedhin dritë mbi rrethanat e tragjedisë dhe mbi përgjegjësitë e mundshme të autoriteteve që autorizuan lundrimin.
