Kryeministri Edi Rama ka ndarë në Facebook një video të historianit dhe filozofit Yuval Noah Harari, të shoqëruar me mesazhin: “SHKURT E QARTË PËR ALGORITMIN nga Yuval Noah Harari, një nga mendjet më largapamëse të botës së sotme”. Në videon e publikuar, Harari shpjegon se algoritmet e platformave si Facebook, X dhe TikTok janë ndërtuar kryesisht për të rritur angazhimin e përdoruesve dhe jo për të krijuar besim apo për të promovuar të vërtetën.
Harari thotë se qëllimi i dhënë algoritmeve është: rritni angazhimin e përdoruesve. Për të arritur këtë, algoritmet eksperimentuan me miliona e miliarda “guinea pigs” njerëzorë për të zbuluar si t’i bëjnë njerëzit të qëndrojnë më gjatë në platforma dhe të reagojnë më shumë, për shembull duke shpërndarë postimin me të tjerë. Nga këto eksperimentime u zbulua se mënyra më e lehtë për të rritur angazhimin është aktivizimi i emocioneve më të forta njerëzore, si urrejtja, frika, zemërimi dhe lakmia.
Sipas Hararit, rezultat është mbushja e botës me urrejtje, frikë, zemërim e lakmi, çka krijon një mjedis “hiper-angazhues”. Ai lidh këtë me gjendjen emocionale të shoqërisë dhe paralajmëron se ekspozimi i vazhdueshëm ndaj një niveli të tillë të lartë stimulimi mund të ketë pasoja të dëmshme. Harari thekson se “engagement” është një kushëri shumë e afërt e fjalës “eksitim” dhe shpjegon se eksitimi përkthehet biologjikisht në një sistem nervor të hiperaktivizuar.
Ai vë në dukje se eksitimi është i dobishëm në disa situata, por mbajtja e një organizmi në gjendje eksitimi për një kohë të gjatë çon në shembje dhe vdekje; njerëzit nuk janë të ndërtuar për të qenë të eksituar vazhdimisht. Harari përmend se, kur takon njerëz, do të preferonte të takohej me ata që e bëjnë të ndjehet i qetë, jo domosdoshmërisht i eksituar. Në përfundim, ai shënon se politika amerikane, izraelite dhe politika botërore duket se janë tepër të eksituara, duke riforcuar idenë të rrezikut që sjell niveli aktual i stimulimit emocional nga platformat online.
