Një tjetër figurë e lartë e ushtrisë kineze është hequr nga detyra në kuadër të asaj që përshkruhet si një “valë spastrimesh” e presidentit Xi Jinping. Shtatë muaj pasi u zhduk nga skena publike, është formalizuar shkarkimi nga Komisioni Qendror Ushtarak i gjeneralit Zhang Youxia, i cili për shumë kohë konsiderohej ndër bashkëpunëtorët më të afërt të Xi-së.
Zhang, 76 vjeç, ishte gjenerali më i fuqishëm i Ushtrisë Çlirimtare Popullore dhe, sipas burimeve, kishte një marrëdhënie personale shumë të ngushtë me presidentin kinez që nga adoleshenca; Xi Jinping e quante atë me respekt “vëllai i madh”. Megjithatë, në janar Ministria e Mbrojtjes njoftoi se Zhang dhe një tjetër gjeneral i lartë, Liu Zhenli, ishin nën hetim për “shkelje të rënda të disiplinës dhe ligjit”. Tani të dy janë shkarkuar zyrtarisht nga postet e tyre.
Shkarkimet vijnë pas një fushate të gjatë të Xi-së kundër zyrtarëve të ushtrisë: që nga ardhja në pushtet në 2012, më shumë se 110 oficerë të lartë janë larguar nga strukturat ushtarake, prej të cilëve rreth 60 vetëm që nga viti 2024. Zyrtarisht shumica e tyre janë akuzuar për korrupsion, por në rastin e Zhang dhe Liu akuzat që raportohen nga shtypi ushtarak shkojnë përtej korrupsionit: ata akuzohen se “kanë dëmtuar rëndë autoritetin e presidentit” dhe kanë minuar besnikërinë e ushtrisë ndaj Partisë Komuniste, akuza që mund të lexohen si kërkesa për përgjegjësi për tradhti ndaj udhëheqjes së partisë.
Sipas disa analistëve amerikanë, Zhang Youxia mund të ketë kundërshtuar planet për përdorimin e forcës ndaj Tajvanit, duke vlerësuar se Kina nuk mund të përballonte një reagim ushtarak të Shteteve të Bashkuara. Analistët vërejnë gjithashtu se largimi i Zhang ka tkurrur përbërjen e Komisionit Qendror Ushtarak, i cili fillimisht përbëhej nga shtatë anëtarë dhe tani mbetet me vetëm dy persona: Xi Jinping dhe gjenerali Zhang Shengmin, i cili është përgjegjës për fushatën kundër korrupsionit. Sipas analistëve, shkarkimet mund të paraprijnë fillimin e proceseve gjyqësore dhe dënimeve për të akuzuarit.
