Pas shtatë sezonesh lidhja mes Milanit dhe Rafael Leao mbyllet. Marrëdhënia e nisur si një histori pasioni, me ngritje dhe rënie, përfundon pasi lojtari u shndërrua nga idhull në subjekt kritike. Portugezi ishte simbol i rilindjes së klubit dhe i momenteve të vështira, gjithnjë në qendër të diskutimeve për shkak të talentit të tij dhe mosrealizimit të plotë të potencialit.
I transferuar te Milani në 2019, pak më shumë se 20 vjeç, Leao luajti rol kyç në fitimin e titullit të 19-të në 2022. Goli i tij vendimtar kundër Fiorentinës dhe ai ndaj Atalantës, si dhe kontributet në ndeshjet vendimtare të fundit të kampionatit, janë ndër momentet kryesore që ndihmuan klubin të arrinte suksesin. Një vit më pas Milani përfundoi i katërti dhe u përball me zhgënjim pas humbjes në gjysmëfinalen e Ligës së Kampioneve, megjithëse Leao shënoi 15 gola dhe dha 10 asistime në kampionat. Në rrugën drejt gjysmëfinales ai u dallua në çerekfinale kundër Napolit me paraqitje që përshkruhen si “hyjnore”.
Sezonet pasuese karakterizohen ngaperiudha të vështira të lidhura me problemet me trajnerët dhe uljen e formës së Leao. Raportet e tensionuara me trajnerin Fonseca, një episod i diskutueshëm për pauzën e hidratimit në ndeshjen me Lazion dhe humbja në finale të Kupës së Italisë kundër Bolognas përmenden si shenja paralajmëruese. Nën drejtimin e Allegrit, Milani dështoi sërish të kualifikohet për Ligën e Kampioneve dhe Leao u shfaq i zbehtë në fund të sezonit, me vetëm një asist në 10 ndeshjet e fundit. Vera e izolimit në shtëpi dhe një iluzion i përkohshëm për qëndrimin te Milani konsiderohen si kapitulli i fundit i marrëdhënies.
Në aspektin statistikor, Leao ka lënë shenjë: 291 ndeshje, 80 gola dhe 65 asistime në 19,690 minuta për shtatë vjet, me një mesatare prej rreth një goli ose asist çdo 135 minuta. Ai renditet i teti në histori të Milanit për kontributet në shënimin e golave, pas emrave legjendarë si Rivera, Shevchenko, Nordahl, Kakà, Van Basten, Altafini dhe Inzaghi. Lamtumira vjen në një moment kur tifozët janë të ndarë, dhe klubi duhet të shikojë përpara.
