Ndërtimi në Shqipëri po shfaqet me një rritje të numrit të lejeve, por me një zhvillim të përzier të sipërfaqeve dhe vlerave të projekteve. Në gjashtë muajt e parë të vitit 2026 janë miratuar 782 leje ndërtimi për ndërtesa të reja, nga 610 në të njëjtën periudhë të vitit të kaluar, rreth 28% më shumë. Sipërfaqja e parashikuar e ndërtimeve u rrit në total në afër 684 mijë metra katrorë, rreth 11% më shumë se një vit më parë, duke treguar se aktiviteti i ndërtimit mbetet i lartë.
Megjithatë, analizat tremujore reflektojnë një ndryshim të strukturës së tregut. Vetëm në tremujorin e dytë numri i lejeve u rrit ndjeshëm me 30.7% (460 leje në krahasim me 352 një vit më parë), por vlera e përafërt e projekteve të miratuara ra me 13.2%, duke zbritur në 16 miliardë lekë. Kjo tregon një orientim drejt më shumë projekteve në numër dhe sipërfaqe, por me vlerë mesatare më të ulët për projekt.
Në tremujorin e dytë pjesën më të madhe të lejeve e zënë banesat, me 331 leje, ndërsa ndërtesat jo-rezidente — ku përfshihen hotelet, tregtia dhe industria — morën 129 leje. Sektori rezidencial mbetet motori kryesor i ndërtimit: vetëm në tremujorin e dytë projektet rezidenciale përbënin mbi 183 mijë metra katrorë sipërfaqe ndërtimi. Të dhënat nënvizojnë se, në nivel numrash dhe sipërfaqesh, sektori nuk po ngadalësohet, por rritja e sipërfaqeve nuk shoqërohet me të njëjtën rritje të vlerës së investimeve.
INSTAT thekson se të dhënat e tremujorit të dytë janë paraprake dhe bazohen në raportimet e bashkive. Në shifra nuk përfshihen lejet e miratuara nga Këshilli Kombëtar i Territorit dhe Ujit, ku nda përfshihen projekte turizmi, rezidenciale, infrastrukturë publike, ndërhyrje në energji dhe transport. Këto leje nuk raportohen në statistikat zyrtare, për çka INSTAT evidenton mungesë transparence në mbulimin e disa kategorive projektesh.
