Drejtoria e Përgjithshme e Burgjeve ka njoftuar përforcimin e sistemit penitenciar me automjete të blinduara dhe autoburgje, që do të përdoren për transportin dhe shoqërimin e të burgosurve jashtë ambienteve të IEVP-ve. Sipas drejtuesve, mjetet e reja janë të destinuara veçanërisht për transportin e personave me rrezikshmëri të lartë, me qëllim rritjen e sigurisë gjatë çdo lëvizjeje dhe shoqërimi.
Drejtoria thekson se kjo masë synon të ofrojë më shumë mbrojtje jo vetëm për personat e privuar nga liria, por edhe për punonjësit që angazhohen në transportin dhe shoqërimin e tyre. “Siguria nis nga mënyra se si kryhet çdo lëvizje”, nënvizoi institucioni, duke e cilësuar këtë pajisje të re si një standard të ri për sistemin penitenciar.
Vendosja e autoburgjeve të blinduara, sipas Anila Hoxhës, bëhet në një periudhë kur numri i dëshmitarëve të drejtësisë dhe i të penduarve ka arritur në 15 persona, dhe kur të dyshuar të cilësuar si krerë të krimit ndodhen në burgje të sigurisë së lartë. Atyre u bëhen transferime drejt Tiranës për t’u përballur me akuzat e SPAK, dhe përdorimi i automjeteve të blinduara synon forcimin e sigurisë gjatë këtyre transferimeve.
Drejtoria e Përgjithshme e Burgjeve e përshkruan këtë ndryshim si një hap drejt modernizimit të sistemit penitenciar, duke nxjerrë në pah përmirësimin e masave të sigurisë për të privuarit nga liria dhe rritjen e mbrojtjes për stafin. Mjetet e blinduara pritet të përdoren si standard i ri në rastet kur ka nevojë për shoqërim të personave me rrezikshmëri të lartë, në përputhje me nevojën e institucioneve penitenciare për të garantuar shoqërime të sigurta jashtë ambienteve të mbyllura.
