Bashkia e Bulqizës është rrethuar me shirita sigurie pas një alarmi për një bombë të pretenduar në ambientet e institucionit; punonjësit e administratës u larguan nga godina ndërsa autoritetet nisën verifikimet për të përcaktuar nëse bëhej fjalë për kërcënim real apo alarm të rremë. Ky alarm u paraqit si pjesë e një serie kërcënimesh të dërguara mëngjesin e sotëm me e-mail në adresat elektronike të disa institucioneve në qytete të ndryshme të vendit. Mesazhet, të dërguara nga një adresë ende e paidentifikuar, përmbanin përmbajtje kërcënuese dhe terroriste dhe pretendonin se në institucionet e përfshira ishin vendosur bomba.
Pas marrjes së njoftimeve, strukturat e Policisë së Shtetit nisën kontrolle në të gjitha institucionet e përfshira nga kërcënimet. Sipas Policisë, deri tani nga verifikimet nuk është konstatuar prania e ndonjë bombe apo lloj tjetër eksplozivi. Kontrolle të ngjashme janë kryer në disa qytete të vendit për të vlerësuar dhe neutralizuar çdo rrezik të mundshëm.
Në Tiranë, kërcënimet kanë prekur edhe institucione të rëndësishme; në ambientet e SPAK dhe të Gjykatës së Posaçme kundër Korrupsionit dhe Krimit të Organizuar (GJKKO) kanë mbërritur specialistë të Antiterrorit të shoqëruar me qen të trajnuar për zbulimin e eksplozivëve, për të kryer inspektimet e nevojshme. Përgjegjësit e sigurisë kanë vijuar me kontrollin e ambienteve dhe me ç’aktivizimin e çdo rreziku të mundshëm.
Policia e Shtetit iu bëri thirrje qytetarëve të ruajnë qetësinë, duke theksuar se nga kontrollet e deritanishme nuk është konstatuar asnjë eksploziv dhe se nuk ka vend për panik. Në Bulqizë, godina e Bashkisë mbetet e izoluar ndërsa strukturat përgjegjëse vazhdojnë verifikimet dhe kontrollet e nevojshme për garantimin e sigurisë dhe për të përcaktuar origjinën e kërcënimeve.
