Prova dhe dëshmi të reja zbardhin momentet para vrasjes së 45-vjeçares Lulieta Obzova në Athinë, ku autori identifikohet si 50-vjeçari Altin Allmuça. Të afërm të viktimës dhe të autorit kanë folur për herë të parë për ngjarjen, duke treguar se marrëdhënia mes tyre ishte shoqëruar me ndjekje dhe kërcënime sistematike nga ana e 50-vjeçarit.
Sipas dëshmive, Allmuça dyshohet se e kishte ndjekur vazhdimisht viktimën dhe i kishte dërguar fotografi ku shfaqej me armë, shoqëruar me kërcënimin “Do të vras veten dhe do të të vras ty”. Një familjare deklaroi se “kohët e fundit, kudo që shkonte dhe çfarëdo që bënte, ai e gjente përpara saj”. Të afërmit i kishin sugjeruar Lulietës të denonconte rastin në polici. Ajo kishte vendosur të vendoste pikë mbi marrëdhënien pasi mësoi se ai ishte i martuar dhe kishte një vajzë 19-vjeçare; pas ndarjes, sjellja e tij u bë më agresive.
Para ngjarjes, Allmuça u takua me vajzën e tij dhe i foli në mënyrë që sipas një miku të tij ajo kuptoi se mund të ishte hera e fundit që e shihte: “Të dua shumë. Ti je jeta ime. Por ti më ke lënduar… Mund të mos më shohësh më. Do të jetë hera e fundit që më sheh.” Më pas u kthye në shtëpi, zgjoi bashkëshorten, i la para dhe i kërkoi të kujdesej për vajzën e tyre. Sipas raportimeve, më vonë ai shkoi pranë pallatit ku jetonte viktima, priti që ajo të dilte, e befasoi dhe e qëlloi për vdekje.
Një banor i zonës rrëfeu se dëgjoi një britmë gruaje e më pas katër të shtëna; kur zbriti pa gruan e shtrirë dhe të gjakosur. Pas vrasjes, 50-vjeçari dha vetëvrasje. Të afërmit thonë se viktima kishte shprehur më parë frikën nga sjellja e tij dhe kishte marrë masa mbrojtëse, përfshirë ndërrimin e bravave.
Vajza e viktimës i ka thënë autoriteteve se dinte për lidhjen e nënës dhe se ajo e kishte prishur marrëdhënien. Vajza e Allmuçës shprehu tronditje dhe dhimbje, duke thënë se nuk mund ta besojë se babai i saj bëri atë që bëri, por edhe se ai “ka bërë keq” duke marrë jetën e një gruaje dhe nënës.
