Ethet e fazës “Play-off” të Ligës së Kampionëve arrijnë kulmin me ndeshjet e kthimit të mbrëmjes së sotme dhe të nesërmes, që do të përcaktojnë skuadrat e fundit që kualifikohen në fazën e grupeve. Të martën në orën 18:45 Sabah pritet të presë Hapoel Be’er Sheva, teksa duhet të përmbysë humbjen 1-2 të takimit të parë. Në orën 21:00, LASK kërkon një mrekulli përballë Celtic, pasi ndeshja e parë përfundoi 0-3 në favor të skocezëve. Në të njëjtën orë, Bodø/Glimt do të përballet me NEC, duke hyrë në këtë takim me avantazhin e fitores 3-1 nga ndeshja e vajtjes. Këto përballje priten të vendosin emrat e rinj që do t’i bashkohen elitës evropiane.
Për audiencën shqiptare, Champions League rikthehet në Top Channel, ku gjatë gjithë këtij edicioni çdo të mërkurë ndeshja më e mirë do të transmetohet falas. Mbrëmjen e së mërkurës në orën 21:00 do të transmetohet direkt përballja midis Lyon dhe Fenerbahçe, një duel i hapur pas barazimit 1-1 në ndeshjen e parë. Po në orën 21:00 vendet e tjera do të vendosen edhe në duelet Viking–Dinamo Zagreb, ku takimi i parë u mbyll 2-2; AEK i Athinës–Levski Sofia, pas një përfundimi pa gola 0-0; dhe Celje–Slovan, ku ndeshja e parë përfundoi 1-1.
Mbrëmjet e “Play-off”-it shërbejnë si hap i parë i këtij rrugëtimi, ndërsa pas përcaktimit të të gjitha ekipeve të kualifikuara spektakli do të vazhdojë me shortin zyrtar të fazës së grupeve. Shorti do të transmetohet gjithashtu drejtpërdrejt në Top Channel, duke ofruar mundësinë për të ndjekur live përbërjen e fazës së grupeve dhe vendosjen e klubeve në këtë sezon me formatin e ri.
