Shërbimi sekret amerikan është në dijeni të një videoje të transmetuar nga televizioni shtetëror iranian që duket se kërcënon jetën e Barron Trump, djalit më të vogël të presidentit Donald Trump, raporton CNN. Sipas raportimit, mediat iraniane të linjës së ashpër kanë publikuar vazhdimisht materiale që kërcënojnë jetën e presidentit Trump dhe familjes së tij, pas vrasjes së ish-liderit Suprem të Iranit, Ajatollah Ali Khamenei, dhe shumë prej familjarëve të tij në fillim të luftës SHBA-Izrael kundër Iranit në muajin shkurt.
Më parë janë bërë kërcënime ndaj Zonjës së Parë, Melania Trump, por ky është hera e parë që si shënjestër përmendet Barron. Për CNN, zëdhënësi i Shërbimit Sekret, Nate Herring, tha se agjencia “është në dijeni të videos dhe heton çdo gjë që mund të perceptohet si kërcënim ndaj personave që mbrohen prej nesh”. Ai shtoi se për shkak të shqetësimeve lidhur me sigurinë operacionale, agjencia nuk diskuton çështje që kanë të bëjnë me informacionet e inteligjencës për mbrojtjen.
Videoja, rreth tre minuta, nis me një grafikë në gjuhën angleze ku shkruhet: “Ku të vrasim Barron Trump?!”. Ajo tregon vendet ku dihet publikisht se djali i vogël i Trump kalon kohë, përfshirë Trump Tower në Nju Jork. Në fund të videos narratori përmend se njerëzit po “presin me padurim të marrin shpërblimin prej 10 milionë dollarësh”.
Materiali u transmetua gjatë fundjavës nga IRIB, transmetuesi shtetëror iranian që konsiderohet i afërt me qarqet e linjës së ashpër brenda regjimit, dhe drejtuesi i të cilit emërohet drejtpërdrejt nga lideri Suprem i Iranit. CNN thekson se këto media kanë vazhduar të publikojnë përmbajtje kërcënuese ndaj presidentit dhe familjes së tij që nga fillimi i konfliktit që përmendet në raport.
