Presidenti francez Emmanuel Macron u zotua të përshpejtojë dërgimin e pajisjeve të reja ushtarake në Ukrainë, sipas presidentit ukrainas Volodymyr Zelensky, pas një bisede telefonike rreth dy orëshe mes dy liderëve, pas sulmit vdekjeprurës në Kryvyi Rih. Zelensky tha se Macron shprehu gatishmërinë për të ndërmjetësuar me aleatët që kanë rezerva të raketave interceptuese Patriot. Sistemet Patriot konsiderohen ndër sistemet kryesore të afta për të përballuar raketat balistike të përdorura nga Rusia në luftën kundër Ukrainës, dhe Kievi ka kërkuar vazhdimisht më shumë raketa për mbrojtjen ajrore teksa Moska ka intensifikuar sulmet.
Zelensky njoftoi në Telegram se “Ne ramë dakord të përshpejtojmë dorëzimin e pajisjeve dhe raketave franceze”, pa dhënë detaje të mëtejshme, dhe falenderoi Macronin për “konfirmuar gatishmërinë tuaj për të dhënë licenca për prodhimin e raketave.” Ukraina është gjithashtu në pritje të sistemit italo-francez të mbrojtjes ajrore SAMP/T-NG, i cili pritet të ketë aftësi për të rrëzuar raketa balistike, megjithëse ende nuk është testuar në luftime; diplomatët evropianë thonë se sistemi nuk pritet të mbërrijë në Ukrainë para pranverës së vitit të ardhshëm.
Macron i shprehu Zelenskyt “tmerrin dhe emocionin e tij të thellë” për sulmin në një qendër tregtare në Kryvyi Rih, qytet i lindjes së presidentit ukrainas, ku u vranë të paktën 16 persona dhe u plagosën më shumë se 130 të tjerë. Presidenti francez theksoi se “duke synuar sistematikisht civilët dhe duke zgjedhur frikësimin dhe përshkallëzimin, Rusia po përpiqet të demonstrojë forcë, por mbi të gjitha po zbulon dobësinë e saj”.
Zelensky tha se gjatë bisedës u diskutua edhe për gjendjen e negociatave të paqes dhe kontaktet me Shtetet e Bashkuara. “Ne ramë dakord për hapat që mund të hapin mundësi shtesë diplomatike”, deklaroi ai, pa dhënë detaje të mëtejshme mbi këto hapa.
