Pas fitores 4-1 ndaj Monzës në javën e parë të Serie A, trajneri i Interit, Cristian Chivu, vlerësoi paraqitjen e skuadrës dhe foli për disa nga lojtarët e tij. Interi e mbylli pjesën e parë në barazim 1-1, ndërsa pas pushimit shënoi tre gola dhe siguroi tre pikët e para të sezonit.
Për ndeshjen, Chivu pranoi se Monza i vuri në vështirësi dhe theksoi nevojën për t’u dhënë meritat kundërshtarit. Ai përmendi se në fillim skuadra kishte “shumë frenezi dhe pasiguri”, por avantazhi i menjëhershëm në pjesën e dytë i bëri të luanin më të qetë.
Duke folur për Diouf, Zielinskin dhe Bisseck, trajneri rumun i vlerësoi paraqitjet dhe rolin brenda skuadrës, duke theksuar se ata janë pjesë e rëndësishme. “Për mua janë të gjithë titullarë. I aktivizoj në varësi të momenteve dhe karakteristikave të kundërshtarit. Jam i kënaqur me të gjithë djemtë e mi, me mënyrën se si janë stërvitur dhe me gatishmërinë e atyre që janë kthyer nga Botërori,” tha ai, duke treguar besim në rotacionin dhe në përgatitjen fizike të ekipit.
Chivu foli edhe për gjendjen e Marcus Thuram, i cili vijon përgatitjet pas problemeve fizike që pati gjatë Botërorit. Trajneri theksoi se ekipi nuk dëshiron të rrezikojë dhe se po punohet për ta rikthyer Thuram në gjendjen optimale.
Një nga temat e konferencës ishte edhe aktivizimi i Lautaro Martinez si titullar. Chivu shpjegoi se ka “disa nuanca që një trajner duhet t’i kuptojë” dhe kujtoi finalen e Botërorit, duke shtuar se “njeriu vjen përpara çdo gjëje tjetër” Prandaj ishte e drejtë që ai të niste nga minuta e parë. Sipas trajnerit, Lautaro nuk kishte nevojë të këmbëngulte për të luajtur sepse disa momente trajneri i kupton vetë.
Komentet e Chivut reflektuan qasjen ndaj menaxhimit të skuadrës, rotacionit të lojtarëve dhe kujdesit individual pas turneut të përfaqësimeve.
