Futbolli shqiptar po krijon një burim të ri të ardhurash përmes shitjes së lojtarëve në tregjet evropiane. Përtej përfitimeve nga UEFA, sponsorë dhe të ardhurave tradicionale, klubet e Kategorisë Superiore po zbulojnë, zhvillojnë dhe shesin talente, duke ndërtuar një model biznesi që është bërë më i qëndrueshëm në vitet e fundit. Sipas raporteve të FIFA-s dhe të dhënave të tregut të transferimeve, të ardhurat nga shitjet e lojtarëve u rritën nga rreth 465 mijë dollarë në 2023 në 2.47 milionë dollarë në 2024, dhe rreth 2.77 milionë dollarë në 2025. Për periudhën 2021–2025, të ardhurat totale nga shitjet arrijnë rreth 6.85 milionë dollarë, ndërsa shpenzimet për blerje ishin vetëm rreth 485 mijë dollarë, duke lënë një bilanc pozitiv prej mbi 6.3 milionë dollarësh.
Në nivele klubi, fitimet nuk janë të shpërndara në mënyrë të barabartë. Partizani kryeson në periudhën e analizuar, i ndihmuar nga transferimi rekord i Xhuliano Skukës te Metz për rreth 1.4 milionë euro dhe një seri shitjesh të tjera. Transfermarkt regjistron për sezonin 2024/25 të ardhura rreth €1.6 milionë nga largimet e Partizanit, me shitjet kryesore: Arinaldo Rrapaj (€550 mijë), Maguette Gueye (€500 mijë), Tedi Caran (€200 mijë), Christian Mban (€200 mijë) dhe Andi Hadroj (€150 mijë).
Dinamo City ka pasur shpërthim veçanërisht në dy sezonet e fundit. Në 2025/26 klubi regjistroi rreth €1.7 milionë të ardhura: Baton Zabërgja te Metalist 1925 për €800 mijë, Peter Itodo për €700 mijë dhe Karamba Gassama për €200 mijë. Në gusht 2026 Dinamo transferoi edhe Mustapha Koman te Jong Genk në një marrëveshje të vlerësuar rreth €700 mijë, duke afruar klubin ndjeshëm me Partizanin.
Egnatia renditet e treta, duke kthyer suksesin sportiv në përfitim ekonomik: në sezonin 2024/25 realizoi rreth €710 mijë nga largimet (përfshirë Alen Sherri te Cagliari për €360 mijë dhe Melih İbrahimoğlu te Konyaspor për €350 mijë), dhe rreth €620 mijë sezonin pasardhës (Serxho Ujka €300 mijë, Regi Lushkjan €250 mijë). Në total Egnatia llogaritet rreth €1.3–1.6 milionë për periudhën e analizuar.
Klasifikimi për periudhën 2023–gusht 2026 bazohet në transferimet e njohura dhe shifrat e Transfermarkt dhe mediave shqiptare; vlerat janë përafërsuese, pasi klubet nuk publikojnë gjithmonë vlerën reale dhe disa marrëveshje përfshijnë klauzola, bonuse apo përqindje të kartonit. Si pasojë, Kategoria Superiore po transformohet nga kampionat më shumë importues në një stacion tranziti drejt Evropës, ku zbulimi, zhvillimi, ekspozimi dhe shitja e lojtarëve janë bërë burim i rëndësishëm ekonomik, ndërkohë që pritet edhe ndikimi i një ligji të sponsorizimit për të afruar bizneset me sportin.
