Të parët që preken nga ndarja administrative territoriale janë organet drejtuese të KQZ, të cilët duhet të organizojnë zgjedhjet vendore të 2027-shit. Komisioneri Ilirjan Celibashi, në një intervistë për Top Channel me gazetaren Elda Menga, tha se do të ishte e dëshirueshme që kohëzgjatja e përgatitjeve të jetë më e madhe se 6–9 muaj, por nuk mund të përcaktojë tani se sa do të ndikojë ndryshimi territorial në cilësinë e përgatitjeve nga ana infrastrukturore, logjistike dhe organizative.
Celibashi lidh afatet për miratimin e reformës territoriale me dekretimin e datës së zgjedhjeve nga Presidenti. Ai vuri në dukje se nëse Presidenti cakton datën e zgjedhjeve, nuk do të ketë kuptim të zhvillohen ndryshime që ndikojnë në procesin zgjedhor pa qartësi të plotë, dhe se nuk mund të përcaktojë me bindje implikimet ligjore në rast se Kuvendi miraton ndarjen e re territoriale pasi të jetë shpallur data e zgjedhjeve. Kryetari i KQZ-së tha se do të duhet të presin zhvillimet në fillim të sesionit të ri parlamentar dhe sqarime të mëtejshme, pa hyrë në diskutime mbi numrin e bashkive.
Pandemia protestash kundër hartës së re vazhdon: 15 bashki po kundërshtojnë hartën përmes protestave, ndërsa opozita kërkon vendosjen e ndarjes së re me referendum. Skenari i referendumit ballafaqohet me kufizime kohore dhe procedurale; Celibashi theksoi se nuk mund të zhvillohen referendume në ditën e zgjedhjeve, qoftë për Kuvend apo për organet e qeverisjes vendore, dhe se Gjykata Kushtetuese do të duhet të vendosë mbi kushtetutshmërinë e kërkesës për referendum.
Harta e re territoriale aktualisht ndodhet në fazën e konsultimit publik. Partia Socialiste synon ta kalojë reformën në Kuvend në tetor, muaj që përkon me afatin kur Presidenti duhet të dekretojë datën e zgjedhjeve lokale të vitit 2027. Sipas Kodit Zgjedhor, zgjedhjet vendore duhet të mbahen në një të dielë ndërmjet 15 prillit dhe 15 majit.
