Një avion luftarak i ushtrisë së Myanmarit bombardoi një manastir budist në rajonin Sagaing, duke vrarë të paktën 14 civilë dhe plagosur rreth 20 të tjerë. Sulmi ndodhi në fshatin Swel Le Oh, rreth 75 kilometra në perëndim të Mandalay, gjatë një tërheqjeje meditimi ku po merrnin pjesë mbi 100 persona. Sipas Organizatës së Mbrojtjes Civile dhe Sigurisë së Qarkut Myaung, mes viktimave janë 11 burra dhe tre gra.
Ngjarja ndodhi rreth orës 09:00, gjatë periudhës së Kreshmës Budiste. Një banor i zonës, i cituar nga Associated Press, tha se avioni hodhi dy bomba me një interval prej rreth 15 minutash; njëra goditi kompleksin e manastirit dhe tjetra dëmtoi një shtëpi aty pranë, ku pjesëmarrësit po zhvillonin një tërheqje njëjavore. Një luftëtar vendas për AFP-në deklaroi se pesë nga të vrarët ishin nga fshati i tij dhe nëntë nga fshatrat përreth. Sipas një tjetër luftëtari të rezistencës, viktimat ishin kryesisht persona të moshës 50 deri në 70 vjeç, dhe sulmi u përshkrua si i qëllimshëm: “Nuk ishte një rast i shënjestrimit të gabuar. Ata sulmuan qëllimisht një manastir.”
Ushtria e Myanmarit nuk ka bërë koment rreth këtij sulmi. Më herët, junta ka deklaruar se godet vetëm objektiva ushtarake dhe ka akuzuar forcat e rezistencës për përdorim të civilëve si mburojë. Bombardimi erdhi pak ditë pas një raporti të Mekanizmit të Pavarur Hetimor të Kombeve të Bashkuara për Myanmarin, që zbuloi se forcat e armatosura kanë intensifikuar sulmet ajrore ndaj civilëve; hetuesit e OKB-së po mbledhin prova për krime të mundshme lufte dhe krime kundër njerëzimit.
Rajoni Sagaing përbën një nga bastionet kryesore të rezistencës së armatosur kundër juntës, e cila mori pushtetin me grusht shteti në shkurt 2021, duke rrëzuar qeverinë e zgjedhur të Aung San Suu Kyi. Që nga ai moment, Myanmar është përfshirë në një konflikt të armatosur mes ushtrisë, grupeve pro-demokraci dhe milicive etnike. Ndërsa forcat e ushtrisë në terren janë dobësuar, junta është mbështetur gjithnjë e më shumë te sulmet ajrore, çka ka sjellë një rritje të viktimave civile.
