Delegacioni i Global Sumud Flotilla mbërriti në Portin e Vlorës, pas njoftimeve në rrjetet sociale se do t’i bashkohej kauzës për mbrojtjen e Sazanit dhe Vjosës. Në port delegacionin e pritën zv.ministrja e Kulturës dhe Turizmit, Marinela Prifti, dhe drejtoresha e Përgjithshme e Agjencisë Kombëtare të Turizmit, Jola Hysaj. Pas mbërritjes, kryeministri Edi Rama reagoi duke ironizuar misionin e flotiljes dhe duke vlerësuar pritjen institucionale.
Jola Hysaj publikoi një video ku përshkroi se kishte shkuar personalisht në port për t’i pritur anëtarët e delegacionit, të cilët në paraqitjet në Instagram ishin shfaqur si një “ekspeditë e madhe ndërkombëtare”. Sipas saj, në realitet delegacioni ishte një grup i vogël dhe i çoroditur që dukej më shumë si “një grup i arratisur nga shtëpia” sesa si një pararojë revolucioni. Megjithatë, u pritën me respekt dhe me gatishmëri institucionale, dhe u ofrua shoqërimi për të vizituar Sazanin dhe informacion i detajuar për situatën e ishullit. Hysaj tha se delegacioni refuzoi të vizitojë Sazanin, duke njoftuar se do t’i bashkohen “Revolucionit në Tiranë”.
Drejtoresha kritikoi krahasimet e bëra nga organizatorët mes Sazanit dhe Gazës, si dhe përdorimin e imazheve si një flamingo me keffiyeh. Ajo tha se krahasimi është “grotesk, injorant dhe thellësisht fyese”, duke theksuar se në Sazan nuk ka popullsi civile që rrezikon të dëbohet dhe se flamingot jetojnë në lagunat e Nartës, jo në Sazan.
Hysaj deklaroi se Agjencia i dorëzoi delegacionit një dokument informues që sqaronte faktet: nuk ekziston asnjë marrëveshje me palë private, nuk ka projekt arkitektonik të përcaktuar dhe nuk është shitur asnjë metër katror i ishullit. Ajo theksoi se Sazani nuk është dhe nuk ka qenë në shitje; çdo iniciativë private mund të zhvillohet vetëm përmes një bashkëpunimi (joint venture) ku shteti do të jetë partner, me pronësi publike të ishullit të ruajtur.
Hysaj sqaroi gjithashtu parametrat e mundshëm të ndërhyrjes: Sazani ka 562 hektarë, zona e mundshme për ndërhyrje është rreth 45 hektarë (pak më shumë se 8%), dhe intensiteti maksimal i zhvillimit nuk mund të kalojë 0,20% të sipërfaqes së përgjithshme. Monumentet natyrore, kënetat, zonat më të ndjeshme, Parku Kombëtar Detar dhe zona detare e mbrojtur përjashtohen nga çdo zhvillim; aksesit publik dhe kushteve mjedisore u sigurohet garanci. Hysaj përfundoi duke rikujtuar se dera mbetet e hapur nëse delegacioni dëshiron të ndjekë informacionin dhe të vizitojë Sazanin.
