Shërbimet e Komisariatit të Policisë Mirditë finalizuan fazën e dytë të operacionit policor të koduar “Piromani”, duke kapur dhe arrestuar në flagrancë shtetasin A. D., 62 vjeç, banues në fshatin Rraja e Valës, Njësia Administrative Rrëshen, Bashkia Mirditë. Arrestimi u krye për veprat penale “Shkatërrimi i pronës me zjarr” dhe “Shkatërrimi me zjarr i pyjeve dhe i mjedisit pyjor”.
Në momentin e kapjes, 62-vjeçari sapo kishte ndezur një vatër zjarri në fshatin Rraja e Valës. Nga veprimet hetimore dhe ndjekja në terren rezulton se gjatë ditëve të mëparshme ai kishte ndezur edhe pesë vatra të tjera zjarri. Si pasojë e zjarreve është përfshirë nga flakët një sipërfaqe rreth 15 hektarësh.
Shërbimet zjarrfikëse, në bashkëpunim me stafet e Komisariatit të Policisë Mirditë, vijojnë punën në terren për izolimin dhe shuarjen e plotë të vatrave dhe për vënien nën kontroll të zjarrit. Operacionet për shuarje dhe izolim vazhdojnë derisa situata të normalizohet.
Nga verifikimet e kryera rezulton se shtetasi A. D. ka precedent të mëparshëm për zjarrvënie të qëllimshme. Specialistët për Hetimin e Krimeve të Komisariatit të Policisë Mirditë, nën drejtimin e Prokurorisë, vijojnë veprimet hetimore për dokumentimin e plotë të aktivitetit të tij dhe për verifikimin e përfshirjes së tij edhe në raste të tjera të zjarrvënieve që kanë ndodhur më parë në territorin e Bashkisë Mirditë.
Materialet procedurale lidhur me vendimin për arrest dhe hetimet e kryera i janë kaluar Prokurorisë për veprime të mëtejshme.
