Pas muajsh spekulimesh dhe dyshimesh, Curtis Jones është zyrtarisht futbollist i Interit. Mesfushori anglez kalon nga Liverpool te klubi milanez për një shifër prej 30 milionë eurosh plus 5 milionë euro si bonuse, për një total prej 35 milionë eurosh. Pas kryerjes së vizitave mjekësore, Jones nënshkroi një kontratë pesëvjeçare me kampionët e Italisë, që e lidh me klubin deri në vitin 2031.
Sipas raportimit, ai me shumë mundësi do të jetë në San Siro të shtunën për të ndjekur ndeshjen e parë të kampionatit të Interit kundër Monzës. Menjëherë pas nënshkrimit, Jones dha intervistën e parë për kanalet zyrtare të klubit, ku shprehu entuziazmin dhe arsyet që e shtynë drejt transferimit në Milano. Në fjalët e para ai tha: “Kam ndjesi fantastike, kishte kohë që doja të vija te Interi. Jam shumë entuziast.”
Jones përmendi momentet kur u përball me Interin në Ligën e Kampionëve sezonin e kaluar si një nga faktorët vendimtarë. Ai vuri theksin kryesor te pasioni i tifozëve të Interit, duke thënë se përvoja e qëndrimit në fushën e San Siros dhe dëgjimi i mbështetjes dhe këngëve të tyre ndikuan në vendimin e tij. Sipas tij, elementë të tjerë që ndikuan ishin trofetë, historia e klubit dhe emri i lojtarëve të mëdhenj që kanë veshur fanellën zikaltër, por e përmendi pasionin e tifozërisë si vendimtarin kryesor.
Curtis Jones gjithashtu bëri lidhje me përvojën e tij në Liverpool, duke thënë se vjen nga një ambient ku ka ndjerë gjithnjë dashurinë dhe mbështetjen e publikut dhe se ka pasur gjithmonë një lidhje të fortë me tifozët. Ai shprehu shpresën se do të arrijë të krijojë një lidhje të veçantë edhe me tifozët e Interit. Lajmi u raportua nga Top Channel.
