Zbardhet në sallën e gjyqit dëshmia e Sokrat Vatës, i akuzuar për vrasjen e 20-vjeçarit portugez në Ksamil, Luis Miguel Varela Mendes. Gazetarja e Top Channel Dorjana Bezat raporton se Vata deklaroi se e kishte goditur me thikë për vetëmbrojtje, pasi sipas tij viktima i ishte drejtuar me armën e ftohtë.
Para trupit gjykues Vata tha se në lokal ndodhej një grup turistësh francezë që po bënin zhurmë; shoku i tij u kishte kërkuar të ruanin qetësinë, por turistët vazhduan me sharje dhe nisi përleshja fizike. Ai pretendoi se gjatë konfliktit njëri prej turistëve mbante një thikë, të cilën e mori pasi e neutralizoi. Sipas dëshmisë, një prej turistëve e goditi me shkelm në nofull dhe e rrëzoi në tokë; ndërsa turistët tentuan ta godasin sërish, Vata lëvizjen e dorës e bëri instinktivisht për t’u mbrojtur, por nuk kujton se si e goditi viktimën. Ai u citua: “Nuk e kujtoj si e kam goditur. Isha në shok. Nuk e dija nëse ndonjëri prej tyre ishte plagosur, pasi ishin shumë. Nga shoku jam larguar”.
Shtetasi turk Nuh Mahmutoglu, i njohur me Vatën për shkak të bashkëpunimit në shoqërimin e turistëve, deklaroi se Vata e kishte telefonuar rreth orës 06:30 dhe i kishte kërkuar ta shoqëronte drejt Tiranës, duke i thënë se ishte rrëzuar nga motori. Të ndaluarit e tjerë thanë para gjykatës se nuk panë momentin e përleshjes.
Trupa gjykuese e Sarandës vendosi masën arrest me burg për Vatën. Po ashtu u vendos masa “arrest në burg” për Ezgi Parlak dhe Nuh Mahmutoglu, dy shtetasit turq që tentuan ta largonin me makinë. Për Ildi Cekanin dhe Ardit Kasemin u vendos arrest në burg për një afat 45-ditor. Ndërsa për Luciano Seferin, Moisi Matushajn, Romeo Shehun, Murat Zhabina dhe Kristo Kosho u vendos masa “detyrim për t’u paraqitur në policinë gjyqësore”.
