Në zonën Gojan–Gjegjan vatra vazhdon të jetë aktive, por me intensitet më të ulët. Në Gojan të Madh situata paraqitet aktualisht më e qetë; gjatë natës ka vijuar ndërhyrja në zonat e arritshme nga mjetet zjarrfikëse, veçanërisht në pjesët ku flakët po avanconin. Në pjesën e sipërme të Gojanit, në zonën e Meshurdhit, vatra është izoluar plotësisht, duke kufizuar përhapjen në atë sektor.
Vatra në Gojan të Vogël paraqitet më problematike për shkak të afërsisë me zonën e banuar. Mungesa e aksesit rrugor dhe terreni i vështirë kufizojnë ndërhyrjen me mjete tokësore, dhe për këtë vatër po operohet me ndërhyrje nga ajri me dy helikopterë. Në zonën mbi Gjegjan vatra po përparon, por aktualisht nuk paraqitet rrezik për banesat; puna vijon me forcat operacionale tokësore dhe situata monitorohet nga afër në vazhdimësi.
Efektivët e MZSH me mjetet zjarrfikëse janë përqendruar pranë zonave të banuara për të mbrojtur komunitetet dhe për të ndërhyrë nëse situata ndryshon. Në zonë janë të dislokuara 40 efektiv FA, si dhe mjete zjarrfikëse dhe efektivë përkatës nga RKV, MZSH Fushë Arrëz, MZSH Shkodër, Kamëz, Has dhe Kukës. Këto forca tokësore dhe mjete po punojnë në sektorët ku qasja rrugore e lejon ndërhyrjen dhe në pikat ku situata paraqitet më e ndjeshme për shkak të afërsisë me banesat.
Puna e ndërhyrjes përfshin monitorim të vazhdueshëm dhe koordinim midis forcave të dislokuara dhe mjeteve ajrore, duke synuar izolimin e vatrave dhe mbrojtjen e zonave të banuara. Autoritetet dhe ekipet operacionale vazhdojnë të monitorojnë situatën dhe të ndërhyjnë sipas nevojës në zonat e arritshme, ndërsa pjesët me qasje të kufizuar mbeten të vështira për intervenim të drejtpërdrejtë me mjete tokësore.
