Mbetje kockore që dyshohet se u përkasin të paktën 23 personave janë gjetur në territorin e komunës së Zubin Potokut, në veri të Kosovës. Prokuroria Speciale njoftoi se mbetjet janë zbuluar në disa zona ku dyshohet për ekzistencën e varreve masive, ndërsa bëhet fjalë për vlerësime paraprake dhe identiteti i viktimave nuk është përfundimisht konfirmuar. Identifikimi mjeko-ligjor pritet të kryhet pas përfundimit të ekzaminimeve dhe procedurave të nevojshme.
Hetimet në lidhje me gjetjen kanë çuar në ngritjen e procedimeve ndaj tre personave, të identifikuar me inicialet J.R., M.J. dhe M.B., të cilët dyshohen për kryerjen e veprës penale “Krime lufte kundër popullsisë civile” dhe ndodhen në paraburgim. Autoritetet raportojnë se njëri prej të dyshuarve dyshohet se gjatë luftës së Kosovës ka qenë pjesë aktive e Ushtrisë Jugosllave.
Gërmimet në zonë filluan pas verifikimit të informacionit për varre të mundshme masive dhe janë zhvilluar në disa pika, përfshirë Kalludrën e Vogël dhe Jabukën. Autoritetet paralajmërojnë se kërkimet do të vazhdojnë edhe gjatë javëve apo muajve të ardhshëm, pasi mbetjet e gjetura rezultojnë të shpërndara në terren. Rasti lidhet me një nga episodet më të dhimbshme të luftës së Kosovës.
Mbetjet dyshohet se i përkasin 23 shqiptarëve të zhdukur që nga prilli i vitit 1999, të njohur si “grupi i intelektualëve të Mitrovicës”, ndër të cilët kishte mjekë, profesorë, avokatë dhe profesionistë të tjerë. Informacioni për një varr të mundshëm masiv në këtë zonë ishte bërë publik për herë të parë më shumë se një dekadë më parë, dhe sipas Fondit për të Drejtën Humanitare të Kosovës dhe atij të Serbisë, verifikimi i këtij informacioni ka zgjatur më shumë se 20 vjet.
Autoritetet kosovare kanë akuzuar Serbinë për mungesë bashkëpunimi në zbardhjen e fatit të personave të zhdukur dhe kanë kërkuar hapjen e arkivave të institucioneve që kanë vepruar gjatë luftës.
