Në zonën e Pukës vazhdon të përhapet prej ditësh një zjarr i përmasave të konsiderueshme në sipërfaqe pyjore. Flakët kanë përfshirë zona të Gojanit, Gjegjanit dhe Haxhiajve, duke djegur dhjetëra hektarë pyje dhe shkaktuar dëme të konsiderueshme në masivet e gjelbra. Situata paraqitet veçanërisht shqetësuese në Gojan të Vogël, në Njësinë Administrative Gjegjan, ku zjarri po afrohet me shpejtësi drejt zonës së banuar dhe rrezikon shtëpi e infrastrukturë të komuniteteve përreth.
Pamjet e siguruara tregojnë përmasat e vatrave të zjarrit dhe shtrirjen e tymit, i cili ka mbuluar sipërfaqe të mëdha dhe ka reduktuar dukshmërinë në zona të gjera. Era dhe karakteristikat e terrenit po ndikojnë në dinamikën e përhapjes së flakëve, ndërsa vatrat mbeten aktive në pika të ndryshme të masivit pyjor. Ndërkohë, dëmet në sipërfaqet dendësisht të mbjella me pyje janë të dukshme, me zona të djegura që shtrihen përgjatë kufijve të vendbanimeve dhe rrugëve lokale.
Strukturat e emergjencave dhe autoritetet lokale vijojnë punën në terren për izolimin dhe shuarjen e vatrave. Ekipet po përqëndrohen në ndërhyrje për parandalimin e përhapjes drejt zonave të banuara, ndërsa po kryhen operacione për kontrollin e vatrave kryesore dhe monitorimin e përhapjes së tymit. Në këtë fazë, ndërhyrjet konsiderohen të domosdoshme për mbrojtjen e banorëve dhe për minimizimin e dëmeve të mëtejshme në pyje.
Situata mbetet dinamike dhe e paqëndrueshme, me vatra që mund të ndryshojnë intensitetin dhe drejtimin në varësi të kushteve atmosferike dhe terrenit. Zjarri përbën rrezik për zonat e banuara dhe vijon të shkaktojë dëme të mëdha në pyje, ndërsa autoritetet dhe strukturat e emergjencave qëndrojnë në terren duke monitoruar situatën dhe duke ndërmarrë ndërhyrje për shuarjen dhe izolimin e flakëve. Top Channel.
